Փաստ ինֆո

ՀՀ երկրորդ նախագահ Ռոբերտ Քոչարյանի կալանավորման ժամկետը երկարացնելու մասին ՀՔԾ քննիչի միջնորդության քննարկումը հետաձգվեց։ Այն կկայանա վաղը՝ ժամը 10։00-ին։

Նիստից հետո Քոչարյանի պաշտպան Հայկ Ալումյանը լրագրողների հետ զրույցում անդրադարձավ այսօր մեկնարկած նիստին եւ նշեց, որ նիստի ընթացքում պարզապես քննիչը ներկայացրեց իր միջնորդությունը, որից հետո դատախազները հայտնեցին իրենց դիրքորոշումը՝  քննիչի միջնորդությանը միանալու մասին, որը, փաստաբանի խոսքով, տասը էջից ավել է։ «Մի քանի ոչ պարզ դրվագներ կային՝ կապված միջնորդության հետ, որի վերաբերյալ փորձեցինք պարզաբանում ստանալ, զուտ տեխնիկական հարցեր էին,  տեխնիկական բնույթի քննարկումներ ունեցանք», ասաց փաստաբանը։ Ինչ վերաբերում է նախագահող դատավորին, այս պահի դրությամբ պաշտպանական կողմը նրա ինքնաբացարկի անհրաժեշտություն չի տեսնում։

Ալումյանի խոսքով՝ դատավարական հակառակորդները պահանջում են երկու ամսով երկարացնել Քոչարյանի կալանավորումը՝ առաջ բերելով այն նույն պնդումները, ըստ որոնց՝ եթե Քոչարյանը ազատության մեջ մնա, ապա կխոչընդոտի գործի քննությանը․ «Մեր առաջին փաստարկն այն է, որ ոչ թե մենք պետք է ապացուցենք, որ Քոչարյանը չպետք է կալանքի տակ մնա, այլ մյուս կողմը պետք է ապացուցի, որ դա անհրաժեշտություն է, իսկ ես դեռ չեմ տեսել մի նիստ, որի ընթացքում իրենք կարողանան այդ անհրաժեշտությունն ապացուցել»։

Անդրադառնալով Քոչարյանի դեմ տրված ցուցմունքներին՝ պաշտպանը նշեց, որ անգամ Արշակ Կարապետյանի ցուցմունքների հիման վրա հնարավոր չէր կառուցել առկա մեղադրանքը, որը, իր գնահատմամբ, անհեթեթություն է, եւ ոչ մի առնչություն չունի հոդվածի հետ։ Ինչ վերաբերում է մամուլում շրջանառվող լուրերին, թե Ռոբերտ Քոչարյանի դեմ ցուցմունք է տվել նաեւ Սերգ Սարգսյանը, պաշտպանի խոսքով՝ չեն համապատասխանում իրականությանը։  «Սերժ Սարգսյանը գործի առնչությամբ ցուցմունք տվել է, եւ դա, անգամ ամենավառ երեւակայության դեպքում, չի կարող օգտագործվել պրն Քոչարյանի դեմ»,- ասաց փաստաբանը։ Լուրեր էին շրջանառվում նաեւ այն մասին, որ պաշտպանը Քոչարյանի խնդրանքով հանդիպել է Սերժ Սարգսյանին։ Սակայն Ալումյանը հերքեց  նաեւ այս տեղեկությունը․ «Ես տարբեր մարդկանց իրավաբանական աջակցություն եմ ցույց տալիս, եւ Հանրապետական կուսակցության շենքի տարածքում էլ այդ նպատակով եմ եղել, սակայն այդ մարդը Սարգսյանը չէ, եւ դա եղել է այլ գործի շրջանակներում»։

Խոսելով կաշառքի դրվագով ցուցմունքների մասին՝ պաշտպանը նշեց, որ Սիլվա Համբարձումյանի ցուցմունքը Քոչարյանի դեմ որպես ապացույց չէ․ «Թե ինչ ապացույցներ կան, մենք դեռեւս չենք հասկացել։ Երբ դեռ գործի նյութերին ծանոթ չէինք, մեզ թվում էր, թե ինչ-որ  բաներ կան, որ մեզնից թաքցնում են, բայց ինչքան ծանոթանում ենք, տեսնում ենք, որ ոչինչ էլ չկա, հարցրեք իրենցից»։

Վկայակոչելով ավելի վաղ աղմուկ հանած գաղտնալսումները՝ փաստաբանը նշեց  Փաշինյանի այն խոսքը, ըստ որի՝ դատավորի կողմից իրեն մեսսիջ է հասել, որ գործը ջուր է․ «Ես էլ եմ ասում՝ այո, այս քրեական գործը ջուր է։ Եվ մնացած ամեն ինչ, որ տեղի է ունենում այս գործի շուրջ, դատական համակարգի նկատմամբ ճնշման ազդեցության արդյունք է»։

Փաստաբանը խոսեց նաեւ Վճռաբեկ դատարան ներկայացրած իրենց երկրորդ բողոքի մասին, որից դեռ նորություն չունեն․ «Վճռաբեկ դատարանը, շատ կոպիտ չասեմ, բայց կողմնակալություն է անում․ այն ժամանակ, երբ դատախազներն էին բողոքարկել Քոչարյանին ազատ արձակելը, շտապեց նրանց բողքը վարույթ ընդունել եւ քննել, իսկ մեր բողոքից երկու ամսից ավել է՝ ոչ մի լուր չունենք, այն աստիճան, որ դրա իմաստն էլ է կորչում, որովհետեւ այսօրվա դրությամբ Քոչարյանն արդեն կալանքի տակ է։ Այսինքն՝ այդ ատյանը ուզում է ցույց տալ, որ ինքն  ավելորդ է մեր դատաիրավական համակարգում»։

Պաշտպանական կողմը բողոք էր ներկայացրել մեղադրանքի հստակեցման համար։ Ի պատասխան «Փաստինֆո»-ի հարցին, թե մասնավորապես ինչն են վիճարկում առաջադրված մեղադրանքում՝ Ալումյանը նշեց․ ․«Ոչ հստակ արտահայտություններ կային, օրինակ՝ գրված էր․ «որոշվեց մարտի 1-ի առավոտյան ցրել ազատության հրապարակում ընթացող ցույցը», հիմա հասկանալի չէ՝ Քոչարյանին վերագրվում է ցրելը թե ինքը տեղյակ էր, որ նման որոշում է կայացվել, թե ինքը դրդել է, այսինքն՝ պետք է մեղադրանքը հստակ լինի, որպեսզի հնարավոր լինի դրանից պաշտպանվել»։

 Ալումյանի խոսքերով՝ իրենց համար հասկանալի է դառնում, որ նախատեսված է խնդիրը ուժային ձեւով լուժել․ «Այսինքն՝ ուղարկել դատարան, դատարանի վրա ճնշում գործադրել ու ստիպել, որ վերջինս մեղավոր ճանաչի Քոչարյանին»։

Ինչպես ավելի վաղ հայտնել էինք, այսօր կեսօրին Երեւան քաղաքի ընդհանուր իրավասության դատարանում մեկնարկել էր ՀՀ երկրորդ նախագահ Ռոբերտ Քոչարյանի կալանավորման ժամկետը երկարացնելու մասին ՀՔԾ քննիչի միջնորդության քննարկումը։

 Քոչարյանի պաշտպան Հայկ Ալումյանը հաստատեց տեղեկությունը, որ Քոչարյանը նիստին ներկա չի եղել։ Նրա խոսքով՝ նպատակահարմար չի գտել գալ, իսկ վաղվա նիստին ներկա կլինի թե ոչ, դեռեւս պարզ չէ։

ՀՀ երկրորդ նախագահին մեղադրանք է առաջադրվել «Մարտի 1»-ի քրեական գործով, նրա եւ եւս 3 պաշտոնյաների մասով հայտարարվել է նախաքննության ավարտի մասին։ 

Հեղինակ` Միլենա Խաչիկյան