Փաստ ինֆո

ԵԱՀԿ-ն վերահաստատում է իր շարունակական աջակցությունը Լեռնային Ղարաբաղի հակամարտության խաղաղ կարգավորման լուծումներ գտնելու ճանապարհին։ Երևանում այսօր հայտարարել է ԵԱՀԿ գործող նախագահ, Սլովակիայի արտաքին գործերի նախարար Միրոսլավ Լայչակը։

ՀՀ արտգործնախարարի հետ համատեղ ասուլիսի ժամանակ ԵԱՀԿ գործող նախագահն ընդգծեց. «Միաժամանակ լիարժեք աջակցությունս եմ հայտնում այն աշխատանքին ու ներգրավվածությանը, որ Մինսկի խմբի համանխագահները կարող են այստեղ ներկայացնել», - ասաց Մ. Լայչակը։

Ողջունելով սահմանագծին բռնության եւ մահվան դեպքերի նվազումը՝ նա հույս հայտնեց, որ, որ դա կնպաստի խաղաղ կարգավորման ուղղությամբ համակողմանի գործընթացի իրականացմանը։ «Մարտահրավերները բազմաթիվ են, բայց, կարծում եմ, մենք բոլոր հիմքերն ունենք դրական լիցքեր հաղորդելու այս գործընթացին, մասնավորապես՝ հաշվի առնելով այն, ինչ տեսել ենք վերջին ամիսների ընթացքում»,- նշեց ԵԱՀԿ գործող նախագահը:

«Ես կցանկանայի նաև ընդգծել այն, թե ինչքան կարևոր է ուշադրություն դարձնել հարցին, որ բնակչությանը պետք է նախապատրաստել խաղաղությանը, ինչքան կարևոր է ներգրավվել վստահության ամրապնդման գործընթացներում, ինչպես նաև ռիսկերի նվազեցման միջոցառումներում։ Իհարկե, մենք մեծապես գնահատում ենք հանդիպումները, որ տեղի են ունեցել նախագահի ու վարչապետի, ինչպես նաև նախարարների միջև, մասնավորապես, հաշվի առնելով, հրադադարից հետո տեղի ունեցող իրադարձությունների քանակի նվազեցումը և, բնականաբար, համապատասխան քանակով մարդկանց կյանքերը։ Մենք հասկանում ենք, որ հակամարտությունը լուծված չէ, բայց վստահ ենք, որ փուլային, քայլային մոտեցումն ու զարգացող երկխոսությունը, որպես այսպիսին, կբերի այն չնչին բարեփոխումների մարդկանց առօրյա կյանքում», - ասաց Միրոսլավ Լայչակը։

Աղբյուր` Փաստինֆո