Փաստ ինֆո

«Փաստինֆո»-ն շարունակում է ներկայացնել, թե 2008 թ. մարտի 1-ին տեղի ունեցած զանգվածային անկարգությունների ժամանակ 10 զոհերից յուրաքանչյուրն ինչ հանգամանքներում է ստացել կյանքի հետ անհամատեղելի մարմնական վնասվածքները:

Զաքար Հովհաննիսյան՝ ծնված 30.08.1977 թվականին Երևան քաղաքում, նախկինում չդատված, անկուսակցական։

2008թ. մարտի 2-ին` ժամը 02-ին, նա անգիտակից վիճակում տեղափոխվել է Երևանի թիվ 3 կլինիկական հիվանդանոց` որովայնի հրազենային վնասվածքով։ Վիրահատության ընթացքում արձանագրվել է նրա կենսաբանական մահը։
Դիակի դատաբժշկական փորձաքննության եզրակացության համաձայն՝ Զաքար Հովհաննիսյանի դիակի վրա հայտնաբերվել է հրազենային մուտքի անցք որովայնի առաջնային մակերեսին` էպիգաստրալ շրջանում, լյարդի, ստոծանու և ձախ թոքի ստորին բլթի, գոտկային մկանի միջանցիկ վնասվածքներ, գոտկային ձախ կեսի հետին մակերեսի արյունազեղում, որոնք հետևանք են գնդակով լիցքավորված հրազենից արձակված կրակոցի ներգործության: Զաքար Հովհաննիսյանի մահվան պատճառ է հանդիսացել արյան սուր կորուտը:

Տիգրան Խաչատրյանը գլխի շրջանում մահացու վնասվածքն ստացել է Պարոնյան և Լեոյի փողոցների խաչմերուկում` կիրառված հատուկ միջոցների հետեւանքով

Դիահերձման ժամանակ Զաքար Հովհաննիսյանի մարմնից հանվել է 9 մմ տրամաչափի 1 գնդակ: Դատաձգաբանական փորձաքննության եզրակացության համաձայն՝ նշված գնդակը գործարանային արտադրության 9մմ տրամաչափի փամփուշտի մաս կազմող կրակված գնդակ է: Իսկ նման փամփուշտները նախատեսված են «ՊՄ» և «ԱՊՍ» ատրճանակների համար: Գնդակի վրայի կրակման հետքերը բնորոշ են «ՊՄ» ատրճանակից կրակված հետքերին:

Նախաքննությամբ պարզվել է, որ Զաքար Հովհաննիսյանը ցուցարարներին է միացել 2008թ. մարտի 1-ին` ժամը 23-ի սահմաններում, «գույնի» մականունով Արմեն Ավետիսյանի հետ՝ ալկոհոլ օգտագործած վիճակում։

Մարտի լույս 2-ի գիշերը՝ Ժամը 00- 01-ի սահմաններում զանգվածային անկարգության մասնակիցների հետ Զաքար Հովհաննիսյանը գտնվել է Մաշտոցի պողոտայի մոտակայքում, որտեղ էլ ստացել է հրազենային վնասվածքը, իսկ Արմեն Ավետիսյանը, նրան թողնելով անօգնական վիճակում, դեպքի վայրից դիմել է փախուստի։ Զ.Հովհաննիսյանը հիվանդանոց է տեղափոխվել քննությամբ չպարզված անձանց կողմից: Արմեն Ավետիսյանը 1,5 տարի խուսափել է նախաքննական մարմնին ներկայանալուց, հերքել է Զաքար Հովհաննիսյանի հետ զանգվածային անկարգությունների կատարման վայր գնալու և վերջինիս վնասվածքներ ստանալուն ականատես լինելու հանագամանքը, սակայն հարցաքննված շուրջ 15 այլ անձանց ցուցմունքներով հիմնավորվել է հակառակը, որ նրանք եղել են միասին։

2008 թվականին ՀՀ ոստիկանությանը և ազգային անվտանգության ծառայությանը տրվել են հանձնարարություններ` Զաքար Հովհաննիսյանի վիրավորվելուն ականատես անձանց, մեղավորի ինքնությունը պարզելու և նրան հայտնաբերելու ուղղությամբ օպերատիվ միջոցառումներ ձեռնարկելու վերաբերյալ: Ըստ օպերատիվ-հետախուզական տվյալների՝ Զաքար Հովհաննիսյանն առնչություն է ունեցել ԱԺ նախկին պատգամավոր Հակոբ Հակոբյանի, նույն ինքը «Լեդի Հակոբի» յուրայինների՝ Արմեն Ֆարմանյանի հետ:

Թեեւ ամիսներ առաջ՝ 2018 թվականի օգոստոսի 17-ին ՀՀ վարչապետ Նիկոլ Փաշինյանը հայտարարեց, որ «Մարտի 1-ի գործը, ըստ էության, բացահայտված է», սակայն հանրությանն առայժմ հայտնի չէ թե իշխանափոխությունից հետո ինչ նոր հանգամանք է պարզվել, հայտնաբերվել է արդյոք հրազեն կիրառած անձը։ Համենայն դեպս՝ Զ.Հովհաննիսյանի մահվան համար որեւէ մեկին մեղադրանք առաջադրվելու մասին պաշտոնական հաղորդագրություն չի տարածվել։

Շարունակելի

Աղբյուր` Փաստինֆո