Փաստ ինֆո

«Մեդիաների նկատմամբ հայցադիմումների աճի տենդենց է նկատվում»,- «Փաստինֆո»-ի հետ զրույցում ասաց Հայաստանի ժուռնալիստների միության նախագահ Սաթիկ Սեյրանյանը՝ անդրադառնալով այն թեմային, որ
2019 թվականի հունվար-փետրվար ամիսներ արդեն 5 հայցադիմում է ներկայացվել ընդդեմ մամուլի:

«Փաստինֆո»-ն ավել վաղ հաղորդել է, որ դատական հայցեր են ներկայացվել «Շամշյան Մեդիա» ՍՊ -ի, «Հրապարակ», «Ժամանակ», «Հայկական ժամանակ» օրաթերթերի և Politik.am կայքի խմբագիր Բորիս Թամոյանի դեմ:

Սեյրանյանը նշեց, որ իրենք ուսումնասիրություն չեն կատարել, ուղղակի հետևում են գործերի ընթացքին, բայց կարծում է՝ մամուլի դեմ հայցադիմումների դեպքերը նախորդ տարիների հետ համեմատ ավելի շատ կլինեն։

«Ինչ-որ ձևով փորձ է արվում մենամարտել, պատերազմել մեդիայի դեմ։ Ամպեր են կուտակված մեդիայի գլխին։ Նոր իշխանությունների գալուց հետո բազմաթիվ նման դեպքերի ականատես ենք եղել։ Եթե մենք՝ մեդիաներս էլ չասենք, իրենք իրենց տեքստերով ու հայտարարություններով արդեն խոսում են այդ ամենի մասին»,- նշեց Ժուռնալիստների միության նախագահը։

Սեյրանյանի խոսքերով՝ ինքը թեև չի ընդունում իշխանությունների պահվածքը, բայց հասկանում է նրանց. «Բնականաբար, որևէ իշխանության դուր չի գալիս քննադատական միտքը, այլ կարծիքները։ Առավել ևս, որ իրենք շատ լավ հասկանում են՝ հասարակությունը արթնացել է էյֆորիայից և իշխանություններից ռեալ քայլերի է սպասում։ Այդ իմաստով՝ հայցադիմումների դեպքերը դեռ կշատանան»։

Սաթիկ Սեյրանյանը հայտնեց, որ հաճախակիացել է և՛ առանձին լրագրողների, և՛ լրատվամիջոցների համագործակցությունը ժուռնալիստների միության հետ բազմաթիվ հարցերով։

Խոսքի ազատության պաշտպանության կոմիտեի նախագահ Աշոտ Մելիքյանից ևս փորձեցինք ճշտել, թե արդյոք ուսումնասիրություն կատարել են մամուլի դեմ ներկայացվող հայցադիմումների առումով, արդյոք աճել թե նվազել են դեպքերը։ Աշոտ Մելիքյանը հայտնեց, որ առայժմ հավաքում են առաջին եռամսյակի տվյալները, դրանք կհրապարակեն ավելի ուշ։

«Մարտի վերջում նոր համեմատություններ կանենք։ Առայժմ միայն փաստերի հավաքման փուլն է»,- ասաց պարոն Մելիքյանը։

Հեղինակ` Աստղիկ Քեշիշյան