Փաստ ինֆո

Կոռուպցիոն հանցագործությունների դեպքերի առթիվ 2018 թվականին ՊԵԿ-ում հարուցվել է 134 քրեական գործ, որոնցով պետությանը պատճառված վնասը կազմում է մոտ 24 մլրդ դրամ։ Այս մասին այսօր տեղի ունեցած մամուլի ասուլիսում հայտարարեց  ՊԵԿ նախագահի տեղակալ Ռուստամ Բադասյանը։  

Բանախոսի ներկայացմամբ՝ 2018 թվականին հարուցված քրեական գործերի թիվն աննախադեպ է։ Այսպես՝  «2016 թվականին քրեական 86 գործի շրջանակում պետությանը պատճառվել է մոտ 5 մլրդ 457 մլն դրամի վնաս, 2017 թվականին 57 քրգործով պատճառված վնասի չափը կազմել է 1 մլրդ 838 մլն դրամ, 2018 թվականին 134 քրգործով՝ 23 մլրդ 983 մլն դրամ գումար՝ նախնական հաշվարկով»։

Քրեական գործերի շրջանակներում 2018 թվականին պետական բյուջե վերականգնվել է մոտ 8 մլրդ 556 միլիոն դրամ, որից 6 մլրդը՝ հունիսից հետո հարուցված  քրգործերի արդյունքում։ Նկատենք, որ 2017 թ.-ին եւս վերականգնում է կազմել է 8 մլրդ 462 մլն իսկ 2016-ին՝ 4 մլրդ 563 մլն դրամ։

«2018 թվականի ցուցանիշը հիմնականում ապահովել է հունիս ամսից հետո հարուցված կոռուպցիոն բնույթի քրեական գործերով, որոնց վերաբերյալը ՊԵԿ-ը հանդես է եկել հրապարակումներով», - ասաց ՊԵԿ նախագահի տեղակալը։

Բադասյանի խոսքերով՝ պետությանը պատճառված վնասի հիմնական մասն արձանագրվել է գազալիցքավորման կայանների  տնտեսվարողների կողմից՝ մոտ 16 մլրդ դրամ, որին հաջորդում են կարգո ընկերությունները՝ 2 մլրդ 222 մլն, ապա շինարարական գործունեություն իրականացնող տնտեսվարողները՝ 1 մլրդ 273 մլն դրամ և ապահովագրական ընկերությունները՝ 427 մլն դրամ։

ՊԵԿ նախագահի տեղակալը «Փաստինֆո»-ի հարցին ի պատասխան հայտնեց, որ  վերականգնված գումարներն ամբողջությամբ փոխանցվում են պետբյուջե, բայց նաեւ հավելեց, որ  վերականգնված գումարների հետ կապված օրինական ուժի մեջ մտած դատավճիռներ չկան։ «23 մլրդ 983 մլն դրամը հիմա քննչական վարչությունում քննվող ընթացիկ գործերն են։ Այնտեղ, ընդհանուր առմամբ, 300-ից ավելի նախաքննության փուլում գտնվող քրեական գործ կա»,-ասաց Ռուստամ Բադասյանը։

Աղբյուր` Փաստինֆո