Փաստ ինֆո

Այսօր՝ առավոտյան ժամը 10-ից, ՀՀ կառավարության շենքի դիմաց բողոքի ակցիա են անցկացնում ՀՀ-ում գործող գրավատների եւ փոխանակման կետերի տասնյակ աշխատակիցներ՝ տարբեր պաստառներով. «Խոշոր բիզնեսի կառավարություն», «Ես դառնում եմ գործազուրկ», «Կառավարությունն սպանում է միջին բիզնեսը»։ Պատճառը «Պետական տուրքի մասին» ՀՀ օրենքում սպասվող փոփոխություններն են։ «Փաստինֆո»-ի հետ զրույցում ակցիայի մասնակից Տաթեւը նշեց, որ իրենք պահանջում են, որ պետական տուրքի գումարը այդ չափով չփոփոխվի. «Եթե փոփոխվելու է, թող գոնե նվազագագույն չափով փոփոխվի, որովհետեւ նշված տոկոսադրույքը ահռելի թիվ է թե գրավատաների, թե փոխանակման կետերի համար»։ Ակտիվիստի խոսքով՝ եթե այն սկսի գործել, գրավատների եւ փոխանակման կետերի 90 %-ը կփակվի, եւ վտանգ կա, որ ոլորտը կմոնոպոլիզացվի։

Բանն այն է, որ կառավարությունը «Պետական տուրքի մասին ՀՀ օրենքում փոփոխություններ եւ լրացումներ կատարելու մասին» նախագծով պատրաստվում է 60 անգամ, այն է՝ 6000 %-ով ավելացնել նշված ոլորտների պետական տուրքը, ինչի արդյունքում գրավատների համար ներկայիս 100.000 դրամի փոխարեն կսահմանվի 6 միլիոն, փոխանակման կետերի համար՝ 50.000-ի փոխարեն՝ 3 միլիոն դրամ պետտուրք։

Ի պատասխան մեր հարցին՝ արդյո՞ք մինչ այս նախագծի շուրջ քննարկում ունեցել են, մեր զրուցակիցը նշեց, որ քննարկան որեւէ առաջարկ չի եղել. «Թող կազմակերպեն, մարդիկ կգնան, իրենց կարծիքները կհայտնեն, եւ եթե կպարզվի, որ դրանք չեն համապատախանում կառավարության պատկերացումներին, ուրիշ տարբերակ չի մնում, ի՞նչ ասեմ, թող բարձրացնեն, բայց իրականում նման բան չկա, չհամապատասխանել չեն կարող. բոլոր կազմակերպություններն էլ հաշվետու են Կենտրոնական բանկին, եւ հաշվետվություններից էլ թվերը պարզ երեւում են»։

Նշենք, որ այս պահի դրությամբ ստորագրահավաք է ընթանում. բողոքին միացած կազմակերպություններն ու աշխատակիցները ստորագրում են գրությունը, որից հետո այն կհանձնեն կառավարությանը։

Հեղինակ` Միլենա Խաչիկյան