Փաստ ինֆո

«Մարտի 1»-ի գործով քննչական խմբի նախկին ղեկավար, նույն գործով մեղադրյալ Վահագն Հարությունյանի պաշտպան Միհրան Պողոսյանը ապօրինի է որակում դատարանի այսօրվա որոշումը: «Հետախուզում հայտարարելու ժամանակ վարույթն իրականացնող մարմնին հաստատապես հայտնի էր իմ պաշտպանյալի գտնվելու վայրը, դրան անգամ դատախազն էր անդրադարձել իր կողմից կայացված որոշման մեջ, այսինքն` միմիայն այս հանգամանքը հիմք էր եզրակացնելու, որ նա չի թաքնվել վարույթն իրականացնող մարմնից, հետեւաբար իմ ներկայացրած բողոքի մերժումը դատական համակարգի հերթական ապօրինի ակտն էր»,-մեկնաբանելով դատարանի որոշումն ասել է փաստաբանը:

«Փաստինֆո»-ն ավելի վաղ հայտնել էր, որ այսօր՝ մարտի 11-ին, Երեւան քաղաքի ընդհանուր իրավասության դատարանը՝ դատավոր Արտուշ Գաբրիելյանի նախագահությամբ, մերժեց Վահագն Հարությունյանի նկատմամբ հետախուզում հայտարարելու քննիչի որոշման դեմ պաշտպան Միհրան Պողոսյանի ներկայացրած բողոքը։

Պողոսյանի խոսքով` դատարանի այսօրվա որոշմանը դեռ ծանոթ չեն, քանի որ հրապարակվել է միայն եզրափակիչ մասը, որոշումը ստանալուց հետո կծանոթանան պատճառաբանական մասում ներառված հիմքերին եւ կնախապատրաստեն Վերաքննիչ բողոք:

Ի պատասխան մեր հարցին` արդյո՞ք այս որոշումը սպասելի էր իրենց համար, պաշտպանը նշեց. «Իրավունքի տեսանկյունից սպասելի չէր, որովհետեւ հետախուզման մասին որոշումը անհիմն է` պայմանավորված խափանման միջոց չլինելու եւ այլ հանգամանքներով, բայց հաշվի առնելով դատավորի, ինչպես նաեւ` Վահագն Հարությունյանի անձը` նաեւ սպասելի էր»:

Մեր դիտարկմանը, թե դատավորի ինքնաբացարկի առաջարկի չանտեսման դեպքում հնարավո՞ր էր այլ արդյունք տեսնել, Պողոսյանը նշեց, որ իրենք այլ տարբերակ պարզապես չունեին, որովհետեւ հայտարարված հետախուզման առկայության պայմաններում Վահագն Հարությունյանն արդեն իսկ որոշակի գործողությունների սահմանափակում ուներ. «Այս բողոքը չորս ամիս է` քննվում էր, եւ մենք որեւէ երաշխիք չունեինք, որ եթե չանտեսեինք ինքնաբացարկի առաջարկը, նոր դատավորը նույն կերպ քննություն չէր անցկացնի, եւ չորս ամիս չէր տեւի բողոքի քննությունը, որ հնարավոր եղավ իրականացնել մեկ դատական նիստում»:

Միհրան Պողոսյանի կարծիքով` գերնպատակը Վահագն Հարությունյանին կալանքի տակ տեսնելն է, այդ պատճառով էլ վարույթն իրականացնող մարմինը ձեռնամուխ է լինելու անհիմն գործողությունների կատարմանը:

Հեղինակ` Միլենա Խաչիկյան