Փաստ ինֆո

Այսօր՝ մարտի 11-ին, Երեւան քաղաքի ընդհանուր իրավասության դատարանը՝ դատավոր Արտուշ Գաբրիելյանի նախագահությամբ, մերժեց «Մարտի 1»-ի գործով քննչական խմբի նախկին ղեկավար, նույն գործով մեղադրյալ Վահագն Հարությունյանի նկատմամբ հետախուզում հայտարարելու քննիչի որոշման դեմ պաշտպան Միհրան Պողոսյանի ներկայացրած բողոքը։ Այս մասին հաղորդում է «Փաստինֆո»-ի թղթակիցը՝ դատարանի դահլիճից։

Նշենք, որ Վահագն Հարությունյանի նկատմամբ հետախուզում էր հայտարարվել դեռեւս 2018 թ. հոկտեմբերին, ինչի դեմ փաստաբանը բողոք էր ներկայացրել  2018 թվականի նոյեմբերի 28-ին։ Վահագն Հարությունյանի պաշտպան Միհրան Պողոսյանը պնդում էր, որ հետախուզում հայտարարելու մասին որոշումը անհիմն է, չպատճառաբանված եւ հետապնդում է բուժման մեջ գտնվող եւ այդ մասին նախաքննության մարմնին տեղեկացրած, այդ կերպ` հարգելի պատճառով ՀՀ չվերադարձած եւ նախաքննության մարմին չներկայացած անձի տեղաշարժվելու իրավունքի սահմանափակման նպատակ։

Ւսկ գործով մեղադրող դատախազ Պետրոսյանը բողոքը անհիմն էր համարում՝ պնդելով, որ չկա որեւէ ապացույց, որը կվկայի քրեադատավարական ընթացակարգի սահմաններում մինչդատական վարույթ իրականացնող մարմնի կողմից Հարությունյանի իրավունքների անհամաչափ սահմանափակման մասին:

Հիշեցնենք, որ Վահագն Հարությունյանը որպես մեղադրյալ էր ներգրավվել ՀՀ ՔՕ 38-349 հոդվածի 3-րդ մասի 1-ին կետով (ապացույցներ կեղծելը, որը կատարվել է ծանր կամ առանձնապես ծանր հանցագործությունների վերաբերյալ գործերով), 308–րդ հոդվածի 2-րդ մասով (պաշտոնեական լիազորությունները չարաշահելը, որն անզգուշությամբ առաջացրել է ծանր հետեւանքներ) եւ 309-րդ հոդվածի 2-րդ մասով (պաշտոնեական լիազորություններն անցնելը, որը զուգորդվել է բռնություն, զենք կամ հատուկ միջոցներ գործադրելով):

Վ.Հարությունյանը հայտարարել էր, որ չի ընդունում առաջադրված մեղադրանքը։

Նշենք, որ այս տարվա հուլիսին նա ազատվել էր Քննչական կոմիտեի նախագահի տեղակալի պաշտոնից:

Հեղինակ` Միլենա Խաչիկյան