Փաստ ինֆո

«Աշտարակ կաթ» ընկերության կանխամտածված սնանկության հիմքով հարուցված քրեական գործով քաղաքացիների դեմ այլևս դատական ակտեր չեն կայացվի: Այդ մասի կառավարության նիստում հայտարարեց Գլխավոր դատախազ Արթուր Դավթյանը՝ վարչապետ Նիկոլ Փաշինյանի խնդրանքով մանրամասներ հայտնելով  քրեական գործից։

Գլխավոր դատախազի փոխանցմամբ՝  «Քրեական գործով ստուգվում է «Աշտարակ կաթ» ընկերության սնանկության գործընթացը: Գործը հարուցված է առերեւույթ կանխամտածված սնանկության փաստով:

Դժգոհող քաղաքացիների հիմնական պահանջն արտահայտվել է նրանով, որ առաքված ապրանքների դիմաց տնտեսվարողները առաքիչներին կատարել են վճարումներ, սակայն դրանք մուտք չեն արվել կազմակերպության բյուջե եւ սնանկության գործերով կառավարչի կողմից դատական պրոցեսներ են իրականացվել:

Նախնական մեր տեղեկությունները թույլ են տալիս ասել, որ ի հայտ է բերվել, որ բացի օրենքով սահմանված ընթացակարգով մուտքեր ձեւակերպելուց, առկա են նաեւ կրիչներ, որոնցում հիմնավորվում է համապատասխան տնտեսվարողներից գումարների մուտքերը: Սրան լիարժեք պատասխան կտանք ստուգմամբ, որը ծավալուն է»:

Արթուր Դավթյանի խոսքով՝ արդեն իսկ նախաքննական մարմինը նախաձեռնել եւ նամակներ է գրում դատարաններին, որ ստուգմամբ հավանական այսպիսի տեղեկություններ են ձեռք բերվելու, որոնք էական նշանակություն են ունենալու դատական ակտերի պայմաններում. «Այսինքն` քաղաքացիների դեմ այլեւս դատական ակտեր չեն կայացվի: Խնդրել ենք դատական նիստերը հետաձգել, մինչեւ վերջնական պատասխան կունենանք եւ հարցը վերջնականապես կփակվի»:

Դավթյանը նշեց, որ ցավոք արդեն կան դեպքեր, երբ քաղաքացիների դեմ դատական ակտեր են կայացվել, բայց վերադաս ատյաններում այդ խնդիրներին լուծում տալու հնարավորություններ կան:

Արձագանքելով՝ Նիկոլ Փաշինյանը նշեց. «Այսինքն` տնտեսվարողները «Աշտարակ կաթի» առաքիչներին գումարները վճարել էին, հետո պարզվել է, որ դա չի արձանագրվել սահմանված կարգով: Ու երբ ընկերությունը սնանկացել է, այդ տնտեսվարողների նկատմամբ առաջացել են պահանջներ, որ դուք այսքան պարտք ունեք ընկերությանը: Այսինքն, չկար այդ վճարումների ապացույցը: Դա էլ բանավոր, ձեւակերպումներ չտալու հայտնի ավանդույթի օղակներից մեկն է: Հարգելի քաղաքացիներ, երբ ասում ենք, որ պետք է շրջանառությունը փաստաթղթավորել, դա նաեւի այս կարգի դեպքերի մասին է: Եթե մեր տնտեսվարողները ձևակերպեին, այս շղթան ամբողջությամբ աշխատեր, հիմա այսպիսի իրավիճակի առաջ չէին կանգնի: Հիմա հիմնավորվում է, որ վճարումներ արել են, շատ լավ է, որ արդարությունը վերականգնվում է, բայց ճիշտ չեն արել, որ այն ժամանակ համապատասխան ձեւակերպումներով չեն աշխատել»

Աղբյուր` Փաստինֆո