Փաստ ինֆո

Խաղաղ պայմաններում բանակում զոհված զինվորների մայրերն այսօր կրկին կառավարության շենքի դիմաց բողոքի ակցիա էին իրականացնում։ Նրանք պահանջում էին անձամբ հանդիպել վարչապետ Նիկոլ Փաշինյանի հետ՝ քննարկելու իրենց որդիների սպանության գործերը։ «Փաստինֆո»-ի հաղորդմամբ՝  կառավարությունից «սևազգեստ մայրերի» հետ հանդիպեց ՀՀ վարչապետի օգնական Նաիրի Սարգսյանը։ Նա խոստացավ, որ կկազմակերպվի այդ հանդիպումը, բայց մինչ այդ վարչապետին Քննչական կոմիտեից պետք է զեկուցեն ընթացիկ արդյունքների  մասին։ Մայրերի դիտարկմանը, թե ոչինչ էլ չի արվել՝ Սարգսյանը պատասխանեց, որ ոչ մի բան չանելն էլ արդյունք է։

Զոհված զինծառայողների մայրերը մեկ անգամ արդեն հանդիպել են Նիկոլ Փաշինյանի հետ։ Ըստ ծնողների՝ վարչապետն այդ ժամանակ խոստացել էր, որ գործերը կվերանայվեն, բայց դեռևս առաջընթաց չկա։

«Ութ ամիս ա անցել, քննություն չի գնում, ոչ մի բան չի արվում, բոլոր հետքերը վերացրել են։ Վկա կա, ասում են՝ չի գալիս, չի խոսում։ Է խոսացրեք։ Հիմա պահանջում ենք, որ Փաշինյանը մեզ ընդունի, թող Քննչականի Հայկ Գրիգորյանը, զինվորական դատախազության գլխավորները, բոլորը ներկա լինեն, առերես խոսենք, քննարկենք»,- ասացին «սևազգեստ մայրերը»։

«Մենք մտածում էինք, որ նոր իշխանությունների կողմից պատրաստակամություն կա գործերը քննելու, հավատում էինք Նիկոլին, հիմա էլ հավատում ենք, միշտ իրենց կողքին ենք եղել, բայց մտածում ենք՝ իրեն ճիշտը չեն ասում, տեղյակ չեն պահում։ Իսկ ես տղա չեմ մեծացրել, որ ինչ-որ ստոր կենդանիներ խլեն կյանքը ու ազատ ապրեն»,- ասաց զոհված զինվոր Արթուր Ղազարյանի մայրը՝ Իրինա Ղազարյանը։

Իսկ Արման Մուրադյանի մայրը՝ Հերիքնազ Գասպարյանը ասաց, որ Նիկոլ Փաշինյանի հետ հանդիպել է, երբ վերջինս դեռ ԱԺ պատգամավոր էր։ «Ինքը անգիր գիտի իմ գործը։ Իմ որդուն Ղարաբաղում են սպանել, էնտեղ դատել, հետո բերել են Հայաստան, համաներումով դուրս ա եկել։ Սպանության համար ընդամենը 1 տարի 6 ամիս ա նստել։ Հիմա հասարակական կազմակերպությունները, իբր, մոնիթորինգ են արել, որ 5 գործ վերաբացվի, բայց իմ գործը չկա»,- ասաց տիկին Հերիքնազը։

Խաղաղ պայմաններում Ստեփանակերտի զորամասում զոհված Վալերիկ Մուրադյանի մայրը՝ Նանա Մուրադյանը նշեց, որ գործերը վերաբացելու մասին հայտարարությունները կարծես շոու լինեն. «Հայտնում են, թե 5 ծնողների գործ կասեցումից հանել են ու մեզ՝ հինգ ծնողներիս են ցույց տալիս, բայց միայն երկուսիս գործն են վերաբացել ու ինչ-որ ուրիշ մարդկանց են բերել, մտցրել։ Բացի դա, մեզ ասում են, թե 10 իրավապաշտպան հ/կ-ների հետ ուզում են գործը հանրային քննարկման դնել, բայց սրան զուգահեռ ՔԿ-ից քննիչը զանգում, ասում ա, թե էս 9 տարվա ընթացքում իրեղեն ապացույցները ոչնչացվել են, հետքերը չեն վերցվել, ժամանակին փորձաքննություն չեն արել, հիմա ես ոնց քննեմ»։

Նա նշեց, որ մեկ շաբաթից կլրանա իր որդու սպանության 9 տարին, սակայն մինչ օրս ոչ ոք դրա համար պատասխանատվության չի ենթարկվել։ «Այս անպատժելիության մթնոլորտն էլ նորանոր սպանություններ ա բերում։ Մեր երեխեքը կոպեկի արժեք չունեն, բանակում զինվորների հետ վարվում են որպես իրի, եթե էս պահին իրենց պետք չի, կարող են սպանել»,-ասաց տիկին Նանան։ Ըստ նրա՝ իր որդու գործը արդեն երրորդ անգամ է կասեցումից հանվում. «Կասեցնում են գործը, հանում, հետո նորից կասեցնում»։ Տիկին Մուրադյանը, այնուհանդերձ, հույսեր է կապում Նիկոլ Փաշինյանի հետ՝ նշելով, որ եթե չհավատար, այլ միջոցներով կփորձեր լուծել հարցը։

«Սևազգեստ մայրերի» խոսքերով՝ իրենց որդիների մահվան գործերը արդարացիորեն չեն քննվի այնքան ժամանակ, քանի դեռ իրավապահ մարմինների վերնախավում փոփոխություններ չկան։
«Պետք ա նոր կադրեր բերվեն, որ մեր տղաների գործերը քննեն, թե չէ էս մարդիկ, որ ժամանակին կոծկել են էդ գործերը, փողերը կերել են, հիմա ոչինչ էլ չեն անի։ Դավիթ Տոնոյանն էլ, երբ դեռ Պաշտպանության նախարար չէր, ամեն բանից տեղյակ էր, բայց ի՞նչ»,- ասացին կառավարության շենքի դիմաց բողոքի ակցիա իրականացնող մայրերը։

Հեղինակ` Աստղիկ Քեշիշյան