Փաստ ինֆո

ՀՀ Ազգային ժողովի նախագահ Արարատ Միրզոյանը քաղաքական ուժերին հրավիրեց՝ Ընտրական օրենսգրքի բարեփոխումների շուրջ քննարկումների։ ԱԺ նախագահը այս մասին հայտարարեց քիչ առաջ՝ օգտվելով արտահերթ ելույթի իր իրավունքից։ Քննարկվում էր «Հայաստանի Հանրապետության Ազգային ժողովի 2018 թվականի դեկտեմբերի 9-ի արտահերթ ընտրությունների մասին» կենտրոնական ընտրական հանձնաժողովի գործունեության վերաբերյալ ԿԸՀ նախագահ Տիգրան Մուկուչյանի ելույթը:

Արարատ Միրզոյանը նշեց, որ համաձայն է Ընտրական օրենսգրքի և ԿԸՀ-ի աշխատանքի անկատարության վերաբերյալ քննադատություններին` կարեւորելով նաև ընտրությունների ժամանակ քաղաքական կամքի դրսեւորումը։

«Իմ քայլը» դաշինքի պատգամավոր Վահագն Հովակիմյանն էլ բարձր գնահատեց 2018 թվականի արտահերթ խորհրդարանական ընտրությունների ժամանակ իրավապահ մարմինների կատարած աշխատանքը՝ նշելով, որ նրանք լիարժեքորեն կատարեց օրենսդրությամբ իրենց վրա դրված պարտականությունները, մինչդեռ նախկինում այդ պարտավորությունները ստիպված էին ստանձնել ընդդիմադիր քաղաքական ուժերն ու դիտորդները։

Հովակիմյանը ևս անդրադարձավ ԸՕ-ի փոփոխությունների անհրաժեշտությանը. «Մեր Ընտրական օրենսգիրքը լուրջ բարեփոխումների կարիք ունի։ Դրանք պետք է իրականացվեն արտախորհրդարանական ուժերի և քաղհասարակության հետ համատեղ։ Պետք է ունենանք այնպիսի Ընտրական օրենսգիրք, որն ապագայում էլ մշտապես կապահովի ազատ, անկախ ու թափանցիկ ընտրություններ»։


Տիգրան Մուկուչյանը եզրափակիչ ելույթն ամփոփեց՝ ասելով. «ՀՀ-ում տեղի ունեցան ընտրություններ, որոնք լիարժեք կարելի է համարել ազատ, անկախ, թափանցիկ ու ժողովրդավար։ Ընտրությունների ժամանակ մեր կարևորագույն ձեռքբերումն այն էր, որ ընտրողները, քաղաքական ուժերը, լրատվամիջոցներն ու միջազգային դիտորդները փաստեցին ընտրությունների նկատմամբ մեծ վստահությունը»։

ԿԸՀ նախագահը նշեց նաև, որ այս ընտրություններին նույնական էին Երևանի ավագանու վերջին ընտրությունները։ «Դա առաջին ընտրությունն էր, որի արդյունքները անվերապահ ու միանշանակ ընկալում ստացան քաղաքացիների կողմից։ Այժմ պետք է պահպանենք սա ու կատարելագործենք»,-ասաց Տիգրան Մուկուչյանը։

Աղբյուր` Փաստինֆո