Փաստ ինֆո

Երեւան քաղաքի ընդհանուր իրավասության դատարանի Շենգավիթի նստավայրում՝ դատավոր Արտուշ Գաբրիելյանի նախագահությամբ այսօր շարունակվեց Մարտի 1-ի գործով քննչական խմբի նախկին ղեկավար, նույն գործով մեղադրյալ Վահագն Հարությունյանի նկատմամբ հետախուզում հայտարարելու որոշման դեմ պաշտպանական կողմի ներկայացրած բողոքի քննությունը։

Նշենք, որ արդեն 4 ամիս է, ինչ պաշտպանական կողմը բողոք է ներկայացրել, սակայն այն ըստ էության դեռ չի քննվել։

Նախորդ դատական նիստին նախագահող դատավոր Արտուշ Գաբրիելյանը դիմել էր կողմերին՝ առաջարկելով իր բացակայությամբ քննարկելու ինքնաբացարկի անտեսման հարցը: Դատավորը միաժամանակ նշել էր, որ ինքը կարող է գործով անկողմնակալ լինել։

Բանն այն է, որ դատավոր Արտուշ Գաբրիելյանն է քննել նաեւ Վ.Հարությունյանի նկատմամբ որպես խափանման միջոց կալանավորումը կիրառելու մասի ՀՔԾ միջնորդությունը՝ նիստին մասնակից չդարձնելով պաշտպանական կողմին։ Արդյունքում՝ դեկտեմբերի 30-ին նրա կայացրած դատական ակտը վերաքննիչը բեկանեց, բացի այդ փաստաբանի հաղորդման հիման վրա դատավորի նկատմամբ հարուցվեց կապգապահական վարույթ, իսկ ՀՔԾ-ն էլ քրեական գործ հարուցեց հեռախոսագիրը կեղծելու համար։ Այդուհանդերձ՝ դատավորը հայտարարել էր, թե այս գործով կարող է լինել անկողմնակալ։

Կողմերի փոխադարձ համաձայնությամբ մերժեցին դատավորի՝ ինքնաբացարկի առաջարկը: Հարությունյանի պաշտպան Միհրան Պողոսյանը նշեց, որ իրենք դրա համար հստակ պատճառներ ունեն. «Սույն գործով բողոքը դատարան է ներկայացվել դեռեւս 2018 թվականի նոյեմբերի 28-ին, սակայն մինչ այս պահը բողոքի քննություն չէր սկսվել. դատախազ էր վիրահատվել, նիստերը հետաձգվել էին, եւ այլն, եւ այլն: Հետեւաբար, մենք որեւէ երաշխիք չունենք, որ չանտեսելու դեպքում եւս չորս ամիս այս գործը չէր շարունակվի, եւ սա այն դեպքում, երբ քրեական դատավարության կարգը բողոքի քննության համար տասնօրյա ժամկետ է սահմանում: Այսինքն` գործի քննության ողջամիտ ժամկետը արդեն իսկ խախտվել է»: Պաշտպանի կարծիքով` այս պահին խախտվում է իր պաշտպանյալի առավել կարեւոր` ազատ տեղաշարժման իրավունքը, ուստի իրենց կողմը համարում է, որ նախագահող դատավորը կարող է շարունակել գործի քննությունը:

Գործով մեղադրող դատախազ Պետրոս Պետրոսյանը, սակայն, նշեց, որ իրենք պաշտպանական կողմի հետ համաձայնության են եկել այլ հիմքերով. «Դատարանի կողմից առաջ էր քաշվել պարզ հարց` անտեսելու դատարանի կողմից ներկայացված այն ողջամիտ ենթադրությունը, ըստ որի` մի երրորդ, անկողմնակալ անձի մոտ կարող էին հանդես գալ ողջամիտ կասկածներ, որ առկա պայմաններում նախագահող դատավորը կարող է անկողմնակալ չլինել` պայմանավորված պաշտպանական կողմի` մի քանի հանգամանքներով վարույթներ հարուցելու նախաձեռնության հետ: Սակայն դատարանը հավաստիացրել էր, որ որեւէ հանգամանք չի կարող ազդել իր անկողմնակալության վրա»: Մնացականյանի խոսքով` հենց սա է եղել ինքնաբացարկը անտեսելու դիրքորոշումը:

Մինչ հետախուզման որոշման դեմ բողոքի բուն քննարկմանն անցնելը` դատախազը միջնորդեց նաեւ նախաքննության գաղտնիք պարունակող տեղեկությունները, որոնք առկա են ինչպես վիճարկվող որոշումներում, այնպես էլ բողոքում հրապարակային չդառնան:

Նշենք, որ նախորդ նիստի ժամանակ միջնորդություն էր ներկայացվել նաեւ նիստերը դռնփակ անցկացնելու, ինչը, սակայն, մերժվել էր:

Հետախուզում հայտարարելու որոշման դեմ բողոքի քննարկման ժամանակ Վահագն Հարությունյանի պաշտպան Պողոսյանը մանրամասներ հաղորդեց գործի քննության ընթացքից: Նրա խոսքով` 2018 թվականի հոկտեմբերի 30-ին` ժամը 16:00-ին, իր պաշտպանյալը հարցաքննության է կանչվել որպես վկա: Նույն օրը` ժամը 17:20-ին, փաստաբանը վարույթ իրականացնող մարմին է ներկայացրել դիմում, որով հայտնել է, որ Վահագն Հարությունյանը հուլիսի 17-ից առողջական վիճակի հետազոտության եւ բուժման նպատակող գտնվում է ՌԴ տարածքի Մոսկվա քաղաքում, ինչի պատճառով չի կարող ներկայանալ հարցաքննության, սակայն անհրաժեշտության դեպքում կարող է հայտնել իր գտնվելու վայրի մասին կոնկրետ տեղեկություններ, եւ հետագայում` 2018 թվականի սեպտեմբերի 12-ին, ինչպես պաշտպանն է պնդում, դրանք հաղորդվել են:

Նշենք, որ հոկտեմբերի 30-ին որոշում էր կայացվել ՀՀ քրեական օրենսգրքի 38-349 հոդվածի 3-րդ մասի 1-ին կետով Վահագն Հարությունյանին որպես մեղադրյալ ներգրավելու մասին, ինչից հետո քննիչը որոշել էր նրա նկատմամբ հետախուզում հայտարարել, եւ միջնորդություն ներկայացվել Երեւանի ընդհանուր իրավասության դատարան խափանման միջոց կիրառելու նպատակով: Նշված միջնորդությունը նոյեմբերի 2-ին դատարանը բավարարել էր: Սակայն դեկտեմբերի 12-ին դատարանի կողմից կայացված որոշումը վերացվել էր: Այս պահի դրությամբ Հարությունյանի նկատմամբ որևէ խափանման միջոց ընտրված չէ։

Այսպիսով` Միհրան Պողոսյանը, պնդելով, որ հետախուզում հայտարարելու մասին որոշումը անհիմն է, չպատճառաբանված, եւ հետապնդում է բուժման մեջ գտնվող եւ այդ մասին նախաքննության մարմնին տեղեկացրած, այդ կերպ` հարգելի պատռճառով ՀՀ չվերադարձած եւ նախաքննության մարմին չներկայացած անձի տեղաշարժվելու իրավունքի սահմանափակման նպատակ, դատարանին խնդրեց վերացնել նրա նկատմամբ հետախուզում հայտարարելու որոշումը։

Գործով մեղադրող դատախազ Պետրոս Պետրոսյանի խոսքով, սակայն, վարույթն իրականացնող մարմինը հստակ տեղեկություններ ունի այն մասին, որ հետախուզվող մեղադրյալի գտնվելու վայրը պարզված չէ. «Շուրջ 5 ամիս տևող այս գործընթացի ընթացքում հետախուզվող մեղադրյալը լրատվամիջոցներով կարծիքներ է արտահայտել իր վերաբերյալ կայացվող որոշումների և կատարվող քրեադատավարական ընթացակարգերի վերաբերյալ, սակայն երբևէ ուղիղ չի պատասխանել այն հարցին, թե երբ է պատրաստվում վերադառնալ Հայաստան։ Նա ասում է, որ իր գտնվելու վայրը պարզ է, բայց այդ դեպքում ինչո՞վ է պայմանավորված այն հանգամանքը, որ այսքան ժամանակ հետաքննության մարմինը չկարողացավ հայտնաբերել մեղադրյալին»:

Պետրոսյանը բողոքը անհիմն համարեց եւ խնդրեց դատարանին մերժել այն` պնդելով, որ չկա որեւէ ապացույց, որը կվկայի քրեադատավարական ընթացակարգի սահմաններում մինչդատական վարույթ իրականացնող մարմնի կողմից Հարությունյանի իրավունքների անհամաչափ սահմանափակման մասին:

Բողոքի քննության ավարտից հետո դատարանը տեղեկացրեց, որ որոշումը կհայտնի մարտի 11-ին:

Հիշեցնենք, որ Վահագն Հարությունյանը որպես մեղադրյալ է ներգրավվել ՀՀ ՔՕ 38-349 հոդվածի 3-րդ մասի 1-ին կետով (ապացույցներ կեղծելը, որը կատարվել է ծանր կամ առանձնապես ծանր հանցագործությունների վերաբերյալ գործերով), 308–րդ հոդվածի 2-րդ մասով (պաշտոնեական լիազորությունները չարաշահելը, որն անզգուշությամբ առաջացրել է ծանր հետեւանքներ) եւ 309-րդ հոդվածի 2-րդ մասով (պաշտոնեական լիազորություններն անցնելը, որը զուգորդվել է բռնություն, զենք կամ հատուկ միջոցներ գործադրելով): Ինքը՝ Վ.Հարությունյանը հայտարարել է, որ չի ընդունում առաջադրված մեղադրանքը, իսկ իր նկատմամբ քրեական հետապնդումը գնահատել որպես հետապնդում։

Վահագն Հարությունյանն այս տարվա հուլիսին ազատվել էր Քննչական կոմիտեի նախագահի տեղակալի պաշտոնից:

Լուսանկարում՝ փաստաբան Միհրան Պողոսյանը՝ դատարանի դահլիճում։

Հեղինակ` Միլենա Խաչիկյան