Փաստ ինֆո

ՀՀ Ազգային ժողովը առաջին ընթերցմամբ ընդունեց «Լուսավոր Հայաստան» կուսակցության առաջարկած օրենքի նախագիծը՝ «Սահմանված կարգի խախտմամբ պարտադիր զինվորական ծառայություն չանցած քաղաքացիների մասին» ՀՀ օրենքում փոփոխություններ կատարելու մասին։

Օրինագծի հիմնական զեկուցողը ԼՀ կուսակցության պատգամավոր Գևորգ Գորգիսյանն էր, ով նշեց, որ նախագիծը միտված է հնարավորություն տալ այն քաղաքացիներին, որոնց 27 տարին լրացել է, և նրանք այլևս զինապարտ չեն, վերադառնալ հայրենիք, ազատվելով քրեական հետապնդումից` վճարել օրենքով սահմանված գումարը: Ամեն բաց թողնված զորակոչի համար պետք է վճարեն նվազագույն աշխատավարձի 200-պատիկի չափով»։

Նախկին կարգավորմամբ այս ժամանակահատվածը սահմանված էր մինչ 2017-ի դեկտեմբերի 1-ը 27 տարին լրացած քաղաքացիների համար: Այս նախագծով առաջարկվում է այդ ժամկետը երկարաձգել մինչ 2019-ի մարտի 1-ը:

Գորգիսյանը նշեց նաև, որ հանձնաժողովում քննարկումների ժամանակ առաջարկ է եղել ավելի երկարաձգել ժամկետը, սակայն քանի որ օրենքը համաներման տրամաբանություն ունի և թույլ չեն տալիս նախօրոք նման քայլի դիմել, որոշել են ժամկետը սահմանել մինչև մարտի 1-ը:

«Իմ քայլը» դաշինքի պատգամավոր Համազասպ Դանիելյանը դիտարկում կատարեց, որ սա ժամանակավոր լուծում է և հարց ուղղեց զեկուցողին, թե ինչ ռիսկեր կարող է այն պարունակել։ «Արդյոք մարդիկ չե՞ն մտածի, թե, միևնույնն է, ժամկետը էլի կերկարաձգվի»,- հարցրեց պատգամավորը։

Գևորգ Գորգիսյանը պատասխանեց, որ որևէ ռիսկ չի տեսնում և պետք չէ այդ բոլոր երիտասարդներին ընկալել որպես դասալիքներ։ «Մենք կանխակալ ենթադրում ենք, որ նրանք փախել են։ Մինչդեռ մարդիկ տարբեր պատճառներով կարող են հեռացած լինել երկրից։ Պետք է ավելի լիբերալ ու հումանիստ լինենք»,- նշեց «Լուսավոր Հայաստան» կուսակցության պատգամավորը։

 «Իմ քայլը» դաշինքից Վահագն Հովակիմյանն էլ հետաքրքրվեց, թե Քրեական օրենսգրքի 327 հոդվածով քանի հետախուզվող կա և նրանցից քանիսն են օրենքի փոփոխության շահառուները։ Գորգիսյանը նշեց. «Ընդհանուր առմամբ նրանք 11 հազարն են, որոնցից մոտ 2 հազարին է վերաբերելու օրինագիծը»։

Հարակից զեկուցող, «Իմ քայլը» դաշինքի անդամ Արմեն Խաչատրյանը նշեց, որ թեև այս փոփոխությունը ժամանակավոր է, այն հրատապ ընդունման կարիք ունի, կարևորեց նաև հետագա կարգավորումը։ «2016-2017 թվականների ընթացքում 625 անձ վերադարձել է՝ կատարելով համապատասխան վճարումները, որն ընդհանուր առմամբ 795 միլիոն դրամ է կազմել։ Պետք է համակարգային լուծում գտնել, հակառակ դեպքում 2019 թվականի դեկտեմբերի 31-ին նորից բախվելու ենք նույն խնդրին»։ Ըստ Խաչատրյանի՝ անհրաժեշտ է օպտիմալ լուծում գտնել, որը թե՛ կկանխարգելի նմանատիպ հանցագործությունները, թե՛ կնպաստի հայրենադարձությանը։

Աղբյուր` Փաստինֆո