Փաստ ինֆո

Զարուհի Փոստանջյանը պահանջում է վերացնել 2018 թվականի փետրվարին քաղաքապետարանում լրագրողների մասնագիտական գործունությանը խոչընդոտելու դեպքի առթիվ հարուցված քրեական գործը կարճելու մասին որոշումը։  Բողոքի քննությունը տեղի կունենա այսօր՝ 2019 թվականի մարտի 4-ին, ժամը 17:00-ին Երևան քաղաքի ընդհանուր իրավասության առաջին ատյանի դատարանում: Այս մասին տեղեկացանք՝ «Երկիր Ծիրանի» կուսակցության լրատվական ծառայությունից։

Կուսակցության տարածած հաղորդագրության մեջ, ասվում է.

2018 թվականի փետրվարի 19-ին Երևանի ավագանու «Երկիր Ծիրանի» խմբակցության ղեկավար Զարուհի Փոստանջյանը ՀՀ իրավապահ մարմիններին հաղորդում էր ներկայացրել հանցագործության մասին՝ իր հրավերով Երևանի քաղաքապետարան այցելած «Ազատություն» և «Ա1+» լրատվամիջոցների ներկայացուցիչների մասնագիտական, օրինական գործունեությունը խոչընդոտելու և Երևանի ավագանու «Երկիր Ծիրանի» խմբակցության նկատմամբ խտրական վերաբերմունք դրսևորելու դեպքերի առթիվ, որոնք իրականացվել են պաշտոնեական դիրքի չարաշահման միջոցով 

Սույն հանցագործության մասին հաղորդման վերաբերյալ 2018 թվականի  մարտի 3-ին ՀՀ քննչական կոմիտեի հատկապես կարևոր գործերի քննության գլխավոր վարչության ՀԿԳ ավագ քննիչ Արամ Մկրտչյանը (այդ ժամանակ ՀՀ ՔԿ նախագահն էր Աղվան Հովսեփյանը, ՀՀ նախագահը Սերժ Սարգսյանը) որոշում էր կայացրել՝ նյութերով քրեական գործ հարուցելը մերժելու և Երևանի քաղաքապետարանի տեղեկատվության և հասարակայնության հետ կապերի վարչության պետ Արթուր Գևորգյանի նկատմամբ քրեական հետապնդում չիրականացնելու մասին՝ նրա արարքում հանցակազմի բացակայության հիմքով:

Վերը նշված որոշումը բողոքարկվել է ՀՀ գլխավոր դատախազությունում, այնուհետև՝ Երևան քաղաքի ընդհանուր իրավասության դատարանում, որտեղ թիվ ԵԴ/0123/11/18 գործի շրջանակներում բողոքն ամբողջությամբ մերժվել էր՝ անհիմն և չհիմնավորված լինելու պատճառաբանությամբ: Այս որոշման դեմ բերված բողոքը` ՀՀ վերաքննիչ քրեական դատարանը 2018 թվականի օգոստոսի 31-ին բավարարել է, հարուցվել է թիվ 61210508 քրեական գործը: Թիվ 61210508 քրեական գործով քննությունը` լրագրաղների օրինական մասնագիտական գործունեության խոչընդոտելը իրականացրել է  ՀՀ քննչական կոմիտեի հատկապես կարևոր գործերի քննության գլխավոր վարչության ՀԿԳ քննիչ Լուսինե Հարությունյանը:  2018 թվականի դեկտեմբերի 27-ին ՀՀ քննչական կոմիտեի հատկապես կարևոր գործերի քննության գլխավոր վարչության ՀԿԳ քննիչ Լուսինե Հարությունյանը (այդ ժամանակ ՀՀ ՔԿ նախագահն է ՀՀ վարչապետ Նիկոլ Փաշինյանի կողմից նշանակաված Հայկ Գրիգորյանը)  կայացրել է որոշում քրեական հետապնդում չիրականացնելու և քրեական գործի վարույթը կարճելու մասին: Սույն որոշումը Զարուհի Փոստանջյանը բողոկարկել է ՀՀ գլխավոր դատախազ Արթուր Դավթյանին:

2019 թվականի մարտի 4-ին, ժամը 17:00-ին Երևան քաղաքի  ընդհանուր իրավասության առաջին ատյանի դատարանում` Կենտրոն նստավայրում տեղի է ունենալու «Երկիր Ծիրանի» կուսակցության նախագահ  Զարուհի Փոստանջյանի բողոքի քննությունը: Այս մասին տեղեկացանք՝ «Երկիր Ծիրանի» կուսակցության լրատվական ծառայությունից։

Աղբյուր` Փաստինֆո