Փաստ ինֆո

«Ես համալսարանական եմ» նախաձեռնության համակարգող Նարեկ Մալյանը ծաղկեպսակ է տարել ԵՊՀ համալսարանի մոտ՝ հայտարարելով, որ անցած գիշեր մահացել է Սորոսի հիմնադրամը եւ ներկայումս նրա թաղումն են կազմակերպում։

«Փաստինֆո»-ի թղթակցի փոխանցմամբ՝ նախաձեռնության մասնակիցները բերել էին նաեւ Սորոսի հիմնադրամի հայաստանյան մասնաճյուղի ղեկավար՝ «Բաց հասարակության հիմնադրամներ Հայաստանի» գործադիր տնօրեն Լարիսա Մինասյանի լուսանկարը՝ սեւ ժապավենով։

Նարեկ Մալյանը հայտարարեց, որ Սորոսի հիմնադրամը Հայաստանում այլեւս տեղ չունի եւ կոչ արեց անհանդուրժողական լինել «Սորոսի վկաների» նկատմամբ։

Ավելի վաղ նա իր ֆեյսբուքյան էջում գրել էր. «Սորոսի քաղաքացիական հոգեհանգիստը ժամը 13:00 ԵՊՀ գլխավոր մասնաշենքի դիմաց»:

Մարտի լույս 4-ի գիշերը «Ես համալսարանական եմ» նախաձեռնության համակարգող Նարեկ Մալյանը ֆեյսբուքյան իր էջում պնդել է, որ ենթարկվել է հարձակման. ըստ վերջինիս՝ հարձակվողները «Ռեստարտ» նախաձեռնության անդամներից են եղել: Միջադեպից հետո ֆեյսբուքյան ուղիղ եթերում պատահածին անդրադարձել են «Ռեստարտ» նախաձեռնության անդամները։

Նախաձեռնության անդամ Դավիթ Պետրոսյանը պատմել է, որ ի պատասխան հնչեցրած վիրավորանքների, փորձել են Մալյանին գցել աղբամանը: Պետրոսյանը նշել է, որ Մալյանին չեն հարվածել, չեն հայհոյել և գործողությունը չեն կարողացել ավարտին հասցնել

Նարեկ Մալյանն այսօր ԵՊՀ-ի մոտ հայտարարեց, որ դեպքի վերաբերյալ բողոք չի ներկայացրել, քանի որ որեւէ մեկը իրեն չի ծեծել։ «Մարդկանց թվում է, թե այս ակնոցների հետեւում մի շատ փափուկ եւ բարի անձնավորություն է, բայց դա այդպես չէ»,- ասաց Ն.Մալյանը՝ նշելով, որ նմանանատիպ պատմություն կա նաեւ ներկայիս Պետական վերահսկողության ծառայության ղեկավար Դավիթ Սաանասարյանի հետ, որը տեղի է ունեցել 2011 թ., որից հետո վերջինս որոշակի ժամանակ ուղղակի անգործունակ էր։

Ն.Մալյանը ընդգծեց, որ ինքն ամենեւին էլ չի պաշտպանում ԵՊՀ ռեկտոր Արամ Սիմոնյանին։ Կարծում է, որ ժամանակն է, որ նրան ինչ-որ մեկը փոխարինի, բայց այդ ինչ-որ մեկը չպետք է լինի «Սորոսի Հովոն» (հոգաբարձուների խորհրդի անդամ Հովհաննանս Հովհաննիսյանը –խմբ)

Մանրամասները՝ տեսանյութում՝

Հեղինակ` Աստղիկ Քեշիշյան