Փաստ ինֆո

ՀՀ ԱԺ նախկին պատգամավոր, ներկայումս մեղադրյալ Մանվել Գրիգորյանի հայցադիմումն  ընդդեմ Սիլվա Համբարձումյանի դատարանը վարույթ չի ընդունել։ Այս մասին «Փաստինֆո»-ն տեղեկացավ «Դատալեքս» դատական-տեղեկատվական համակարգից։ Դատարանը որոշել է վերադարձնել հայցադիմումը՝ նշելով, որ  հայցվորի կողմից չի ներկայացվել օրենքով սահմանված կարգով և չափով պետական տուրքի վճարումը հավաստող փաստաթուղթ։

Ավելի վաղ «Փաստինֆո»-ն տեղեկացրել էր, որ տվյալ դեպքում հայցվորը խնդրել է պարտավորեցնել պատասխանող Սիլվա Հարությունի Համբարձումյանին հրապարակայնորեն ներողություն խնդրել Արցախի հերոս, գեներալ-լեյտենանտ Մանվել Սեկտորի Գրիգորյանից վիրավորանքի համար, ինչպես նաեւ՝ պարտավորեցնել պատասխանող կողմին hraparak.am կայքի միջոցով տարածել հրապարակային հերքում զրպարտության վերաբերյալ: Այսինքն՝ ներկայացվել են մեկից ավելի պահանջներ, բայց  վճարվել է 4.000 ՀՀ դրամ պետական տուրք դրանցից միայն մեկի համար։

Դատարանը՝ Ն. Ավետիսյանի նախագահությամբ, 26-02-2019-ին որոշել է Մանվել Գրիգորյանի ներկայացուցչի կողմից ներկայացված հայցադիմումը և կից փաստաթղթերը վերադարձնել, իսկ հայցադիմումում թույլ տրված խախտումները վերացնելու և եռօրյա ժամկետում դատարան կրկին ներկայացնելու դեպքում հայցադիմումը դատարանում ընդունված համարել սկզբնական ներկայացման օրը:

Նշենք, որ սույն որոշումը կարող է բողոքարկվել ՀՀ վերաքննիչ քաղաքացիական դատարան այն ստանալուց հետո` եռօրյա ժամկետում:

Մանվել Գրիգորյանի ներկայացուցիչ Կարեն Ղոնյանից ճշտեցինք՝  պատրաստվում են բողոքարկե՞լ թե՞ խախտումները վերացնելուց հետո կրկին ներկայացնել դատարան։ Ղոնյանը խոսքով՝ իրենք դատարանի որոշման օրինակը դեռ չեն ստացել. «Երբ ստանանք, այդ ժամանակ էլ կպատկերացնենք՝ ինչ անել»,- նշեց նա։

Հիշեցնենք, որ թերթին տված հարցազրույցում 24.12.2018 թ.-ին Սիլվա Համբարձումյանը հայտարարել էր, որ Մանվել Գրիգորյանը պետք է դատվի ոչ միայն ռազմամթերք եւ զինամթերք պահելու մեղադրանքներով, այլ նաեւ՝ բռնաբարության։ «Հրապարակ»-ի հետ զրույցում նա նշել էր, որ Մանվել Գրիգորյանը շատերի տունն է քանդել, եւ շատ երեխաների՝ հոգեկան հիվանդ դարձրել։ Համբարձումյանը պնդել էր նաեւ, որ ինքն ասվածի վերաբերյալ փաստեր ունի։

Հեղինակ` Միլենա Խաչիկյան