Փաստ ինֆո

ՀՀ ազգային ժողովի նախկին պատգամավոր Մանվել Գրիգորյանի պաշտպանական կողմը հակված չէ բողոքարկել Մ. Գրիգորյանին  20 միլիոն դրամ գրավի դիմաց ազատ արձակելու միջնորդությունը մերժելու մասին Ընդհանուր իրավասության դատարանի որոշումը։ Այս մասին  «Փաստինֆո»-ն տեղեկացավ Մանվել Գրիգորյանի պաշտպան Արսեն Մկրտչյանից։ «Կարծում եմ՝ այս փուլում անիմաստ է բողոքարկել, ռազմավարական նպատակներից ելնելով՝ այս պահին նպատակահարմար չենք գտնում»,- ասաց փաստաբանը։ Նա նշեց, որ փաստաբանական խմբի կողմից վերջնական որոշում դեռ չկա, բայց, ամեն դեպքում, բողոքարկելուն հակված չեն։

Հետաքրքրվեցինք նաեւ Մանվել Գրիգորյանի առողջական վիճակի մասին։ Ի պատասխան մեր հարցին՝ պաշտպանը նշեց, որ նրան նորից տեղափոխել են քրեակատարողական հիմնարկ, եւ նրա առողջական վիճակը կրկին  «Շատ վատ» է։  «Կենտրոն Քրեակատարողական հիմնարկում հիվանդանոցային պայմաններ չկան, եւ բնականաբար նա չի ստանում այն կանխարգելիչ պրոցեդուրաները, որ ստանում էր հիվանդանոցում,- նշեց Ա.Մկրտչյանը՝ ավելացնելով, որ  բացասական էֆֆեկտները հետագայում իրենց զգացնել կտան։

Հիշեցնենք, որ փետրվարի 27-ին Երեւան քաղաքի ընդհանուր իրավասության դատարանը՝ դատավոր Մարինե Մելքոնյանի նախագահությամբ, մերժել էր Մանվել Գրիգորյանին մոտ 20 միլիոն դրամ գրավի դիմաց ազատ արձակելու պաշտպանական կողմի ներկայացրած միջնորդությունը:

Գրիգորյանը մեղադրվում է ապօրինի կերպով զենք-զինամթերք պահելու, 101 232 917 դրամի գույք յուրացնելու, 1 228 176 342 դրամի հարկերի վճարումից խուսափելու, պետական միջոցներից 1 225 003 300 դրամ վատնելու և շորթմամբ 37 101 100 դրամ արժողությամբ գույքի հափշտակությունը կազմակերպելու մեջ:

Աղբյուր` Փաստինֆո