Փաստ ինֆո

ԵՊՀ ռեկտորի առաջ քաշված հարցը իրավական տեսանկյունից միանգամայն կամայական է։ Այսօր ԵՊՀ հոգաբարձուների խորհրդի նիստի ավարտից հետո հայտարարել է ԵՊՀ ռեկտոր Արամ Սիմոնյանը՝ ընդգծելով. «Ես ժամկետով ընտրված ռեկտոր եմ, որի ավարտին դեռ մեկ տարի կա և կասկածի տակ դրա լեգիտիմությունը ոչ ոք չի կարող դնել»։

Նրա կարծիքով՝ այստեղ կա քաղաքական խնդիր։ «Մարդիկ չեն ուզում ինձ տեսնել այս պաշտոնում, որովհետև ընտրված եմ։ Ես ինքնակամ հրաժարական չեմ տալու։ Ես հավատում եմ, որ հոգաբարձուների խորհուրդը ճիշտ որոշում կընդունի։ Եթե իմ հրաժարականի մասին լինի՝ կենթարկվեմ դրան, բայց բռնի կերպով, ինչ-որ մարդկանց ցանկությամբ դա կատարելն անընդունելի եմ համարում»,- նշեց ռեկտորը։

«Հավաստիացնում եմ , այս աթոռին ես նստած եմ շուրջ 12 տարի, և ինձ համար սա շատ ծանր, հոգնատանջ, բայց միևնույն ժամանակ պատվաբեր աշխատանք է: Ես արել եմ իմ ուժերի չափով այն, ինչ օգուտ է համալսարանին»,- ասաց Սիմոնյանը:

Ռեկտորը պնդում է, որ Երևանի պետական համալսարանը երբևէ ֆինանսական այնպիսի կայունություն չի ունեցել, ինչպես հիմա, և համալսարանի հետընթացի և ճահճացման մասին խոսակցություններն անհիմն են:

«Մենք արդեն 6 տարի առաջ կանխատեսում էինք, որ կգան ծանր ժամանակներ, երբ արտագաղթի հետևանքով և այլ պատճառներով կպակասի ուսանողների թիվը: Մենք այն ժամանակվանից կուտակում էինք գումարներ բանկերում, որպեսզի այսօր կարողանանք մեր հաշվին ապահովել Երևանի պետական համալսարանի կայունությունը: Տարեվերջին մեր բյուջեն եղել է դեֆիցիտային՝ 750 միլիոն դրամից ավելի: Այսօր այդ դեֆիցիտից մնացել է ընդամենը 80 միլիոնը: Սա՞ է վատ կառավարման արդյունք»,- ընդգծեց Սիմոնյանը:

Աղբյուր` Փաստինֆո