Փաստ ինֆո

«Մարտի 1»-ի քրեական գործով քննչական խմբի նախկին ղեկավար Վահագն Հարությունյանի նկատմամբ խափանման միջոցի միջնորդության քննարկման ժամանակ դատական գործի նյութերում հեռախոսագրի կեղծելու դեպքի առթիվ հարուցված քրեական գործով նախաքննությունը կիրականացնի հատուկ քննչական ծառայությունը։ Այս մասին «Փաստինֆո»-ին հայտնեց Դատախազության հասարակայնության և մամուլի հետ կապերի բաժնի պետ Արևիկ Խաչատրյանը:

Ավելի վաղ հաղորդել ենք, որ որ Երևան քաղաքի ընդհանուր իրավասության դատարանը 2018թ-ի դեկտեմբերի 30-ին` դատավոր Արտուշ Գաբրիելյանի նախագահությամբ, քննության առարկա է դարձրել «Մարտի 1»-ի քրեական գործով քննչական խմբի նախկին ղեկավար Վահագն Հարությունյանի նկատմամբ որպես խափանման միջոց կալանավորումը կիրառելու վերաբերյալ ՀՔԾ քննիչի միջնորդությունը եւ բավարարել այն` առանց պաշտպանական կողմի մասնակցության:

ՀՔԾ-ն փորձում է իր համար բարենպաստ որոշում կայացրած դատարանին «մաքրել» կեղծիքից. Միհրան Պողոսյան

Երևան քաղաքի ընդհանուր իրավասության դատարանի նշված որոշման դեմ ներկայացված վերաքննիչ բողոքի քննարկման ժամանակ փաստաբանը կեղծ փաստաթուղթ է հայտնաբերել` «ՀԵՌԱԽՈՍԱԳԻՐ» վերտառությամբ: Ըստ նշված հեռախոսագրի` դեկտեմբերի 30-ին` ժամը 11։25-ին (միջնորդությունը դատավորին մակագրվելուց 11 րոպե անց), Դատարանի աշխատակազմը փորձել է կապ հաստատել Վահագն Հարությունյանի պաշտպանի հետ և տեղեկացնել, որ դատական նիստը նշանակված է նույն օրը ժամը 13։00-ին, սակայն Միհրան Պողոսյանը հեռախոսազանգերին չի պատասխանել։ Վերջինս հայտնել է, որ ինքն այդ օրը հեռախոսազանգ չի ստացել եւ պատրաստակամ է ներկայացնել դա վկայող փաստաթղթեր: Նա համոզված է, որ այդպիսի հեռախոսազանգ ոչ միայն չի կատարվել, այլեւ հետագայում է որպես կեղծ ապացույց զետեղվել վարույթի նյութերում, քանի որ այն չի եղել, երբ 10.01.2019թ. ծանոթացել է նյութերին:

Հայտնաբերված կեղծիքի վերաբերյալ փաստաբանը հաղորդում էր ներկայացրել ՀՔԾ, որտեղից «Փաստինֆո»-ի հարցին ի պատասխան հայտնել էին, որ փաստաբանի հաղորդման հիման վրա հարուցվել է քրեական գործ՝ ՀՀ քրեական օրենսգրքի 325-րդ հոդվածի 1-ին մասի հատկանիշներով, այն է՝ փաստաթղթեր, դրոշմներ, կնիքներ, ձևաթղթեր, տրանսպորտային միջոցների հաշվառման համարանիշներ կեղծելը, իրացնելը կամ օգտագործելը։ Նույն աղբյուրից հայտնել էին, որ քրեական գործն ուղարկել են դատախազություն՝ քննչական ենթակայության հարցը լուծելու համար։

Նշված հոդվածով քրեական գործի հարուցումն առաջացրել էր պաշտպանական կողմի վրդովմունքը։ «Մենք հաղորդման մեջ վկայակոչել էինք դատարանի կողմից ենթադրորեն կատարված մի շարք հանգամանքներ, իսկ 325-րդ հոդվածով գործ հարուցելով ու դատախազություն ուղարկելով փորձում են այդ հանգամանքները քննության առարկա չդարձնել»,- մեր թղթակցին ասել էր փաստաբան Միհրան Պոողսյանը։

Դատախազությունից քիչ առաջ հայտնեցին, որ քրեական գործով նախաքննության կատարումը հանձնարարվել է հատուկ քննչական ծառայությանը։

Աղբյուր` Փաստինֆո