Փաստ ինֆո

Փաստաբան Միհրան Պողոսյանի գնահատմամբ՝ ՀՔԾ-ն փորձում է իր համար բարենպաստ որոշում կայացրած դատարանին «մաքրել» կեղծիքի կատարումից։ Փաստաբանը նման կարծիք է հայտնել «Փաստինֆո»-ի հետ զրույցում՝ անդրադառնալով իրենց հաղորդման հիման վրա ՀՔԾ-ի կողմից հարուցված որոշմանը։ Նա նշեց, որ պաշտոնապես որոշումը դեռ չեն ստացել եւ միայն մամուլի հրապարակումներից են տեղեկացվել 325-րդ հոդվածի 1-ին մասով քրեական գործի հարուցման մասին, բայց եթե դա իրականությանը համապատասխանում է, ապա իրենք դրանում ակնհայտ միտում են տեսնում. «Մենք հաղորդման մեջ վկայակոչել էինք դատարանի կողմից ենթադրորեն կատարված մի շարք հանգամանքներ, իսկ 325-րդ հոդվածով գործ հարուցելով ու դատախազություն ուղարկելով փորձում են այդ հանգամանքները քննության առարկա չդարձնել»։

Միհրան Պողոսյանը կարծում է, որ իրավականն ու օբյեկտիվը կլիներ այն, որ ՀՔԾ-ն քննարկեր նաեւ դատարանի գործողությունները, մասնակցության չափը, իրական կամ ոչ իրական լինելը, եւ եթե քրեական գործով հերքվեր դատարանի մասնակցությունը, այդ պարագայում միայն գործն ուղարկվեր Դատախազություն՝ քննչական ենթակայության հարցը որոշելու. «Թեեւ դիրքորոշմանը բացարձակ համամիտ չենք, սակայն սպասելի էր, որ ՀՔԾ-ն իր համար բարենպաստ որոշում կայացրած դատարանին կփորձեր այսպես ասած «մաքրել» այդ հանցավոր արարքի կատարումից, այսինքն՝ դատարանի եւ քննչական մարմնի միջեւ անձային համընդհանուր համաձայնություն է եղել»,- նշում է պաշտպանը։

Թե որն է լինելու իրենց հաջորդ քայլը, նա այժմ չի կարող ասել. «Որոշումը ստանալուց եւ դրա փաստական եւ իրավական կողմերը ուսումնասիրելուց հետո միայն կորոշենք մեր հետագա անելիքը»։

Հիշեցնենք, որ «Մարտի 1»-ի քրեական գործով քննչական խմբի նախկին ղեկավար Վահագն Հարությունյանի փաստաբանի հաղորդման հիման վրա ՀՀ հատուկ քննչական ծառայությունում քրեական գործ է հարուցվել ՀՀ քրեական օրենսգրքի 325-րդ հոդվածի 1-ին մասի հատկանիշներով այն է՝ փաստաթղթեր, դրոշմներ, կնիքներ, ձևաթղթեր, տրանսպորտային միջոցների հաշվառման համարանիշներ կեղծելը, իրացնելը կամ օգտագործելը։ Այդ մասին «Փաստինֆո»-ն տեղեկացել էր ՀՀ ՀՔԾ մամուլի խոսնակ Մարինե Օհանջանյանից։

Խնդիրն այն է, որ Երևան քաղաքի ընդհանուր իրավասության դատարանը 2018թ-ի դեկտեմբերի 30-ին` դատավոր Արտուշ Գաբրիելյանի նախագահությամբ, քննության առարկա է դարձրել «Մարտի 1»-ի քրեական գործով քննչական խմբի նախկին ղեկավար Վահագն Հարությունյանի նկատմամբ որպես խափանման միջոց կալանավորումը կիրառելու վերաբերյալ ՀՔԾ քննիչի միջնորդությունը եւ բավարարել այն` առանց պաշտպանական կողմի մասնակցության:

Երևան քաղաքի ընդհանուր իրավասության դատարանի նշված որոշման դեմ ներկայացված վերաքննիչ բողոքի քննարկման ժամանակ փաստաբանը կեղծ փաստաթուղթ է հայտնաբերել` «ՀԵՌԱԽՈՍԱԳԻՐ» վերտառությամբ: Ըստ նշված հեռախոսագրի` դեկտեմբերի 30-ին` ժամը 11։25-ին (միջնորդությունը դատավորին մակագրվելուց 11 րոպե անց), Դատարանի աշխատակազմը փորձել է կապ հաստատել Վահագն Հարությունյանի պաշտպանի հետ և տեղեկացնել, որ դատական նիստը նշանակված է նույն օրը ժամը 13։00-ին, սակայն Միհրան Պողոսյանը հեռախոսազանգերին չի պատասխանել։ Վերջինս հայտնել է, որ ինքն այդ օրը հեռախոսազանգ չի ստացել եւ պատրաստակամ է ներկայացնել դա վկայող փաստաթղթեր: Նա համոզված է, որ այդպիսի հեռախոսազանգ ոչ միայն չի կատարվել, այլեւ հետագայում է որպես կեղծ ապացույց զետեղվել վարույթի նյութերում, քանի որ այն չի եղել, երբ 10.01.2019թ. ծանոթացել է նյութերին:

Հայտնաբերված կեղծիքի վերաբերյալ փաստաբանը հաղորդում էր ներկայացրել ՀՔԾ, ինչի հիման վրա քրեական գործ է հարուցվել եւ ուղարկվել դատախազություն՝ քննչական ենթակայության հարցը լուծելու համար։

Հեղինակ` Միլենա Խաչիկյան