Փաստ ինֆո

Մարտի 1-ի գործով քննչական խմբի նախկին ղեկավար Վահագն Հարությունյանի նկատմամբ հետախուզում հայտարարելու մասին որոշման դեմ պաշտպանական կողմի ներկայացրած բողոքի քննարկումը դարձյալ հետաձգվել է։ Այդ մասին  «Փաստինֆո»-ի հետ զրույցում նշեց Վ.Հարությունյանի պաշտպան Միհրան Պողոսյանը։  «Շուտով կլրանա երեք ամիս, որ դատարանները ընդամենը մի որոշման բողոքարկումը չեն իրականացնում, ընդ որում՝ սրանում իր մեղքի բաժինն ունի նաեւ վարույթ  իրականացնող մարմինը, քանի որ ոչ դատախազությունից, ոչ քննչական մարմնից որեւէ պաշտոնատար անձ չի ներկայանում բողոքի քննարկմանը»,- ասաց պաշտպանը։

Մ.Պողոսյանի կարծիքով՝ չներկայանալու հիմքով դատական նիստերի  ձգձգումները միտումնավոր են կատարվում։ «Հարց է առաջանում, թե ոնց է ստացվում, որ դեկտեմբերի 30-ին՝ ոչ աշխատանքային օրով, եւ դատախազը եւ քննիչը մասնակցել են կալանավորելու վերաբերյալ միջնորդության քննարկմանը, սակայն դրանից առաջ դատարանի վարույթում քննվող բողոքով մինչ այս պահը ոչ ոք չի ներկայացել»,- նկատեց փաստաբանը։

«Փաստինֆո»-ի հետ զրույցում Պողոսյանը նշեց նաեւ, որ որեւէ տեղաշարժ չկա նաեւ Վ.Հարությունյանին կալանավորելու միջնորդության քննարկման ժամանակ դատարանի կողմից թույլ տրված պաշտպանական կողմի իրավունքի խախտման եւ կեղծիքներ թույլ տալու հաղորդումների քննարկման գործընթացում։

Ավելի վաղ տեղեկացրել ենք, որ 2018թ. դեկտեմբերի 30-ին Երևանի ընդհանուր իրավասության դատարանը` դատավոր Արտուշ Գաբրիելյանի նախագահությամբ, բավարարել էր Վահագն Հարությունյանի նկատմամբ կալանավորումը որպես խափանման միջոց ընտրելու վերաբերյալ ՀՔԾ քննիչի միջնորդությունը` առանց դատական նիստին մասնակից դարձնելու պաշտպանական կողմին:

ՀՔԾ-ն քրգործ կհարուցի՞ Արտուշ Գաբրիելյանի նախագահությամբ դատարանում կատարված կեղծիքի առթիվ

Փաստաբանը դիմել էր Դատավորների ընդհանուր ժողովի կարգապահական հարցերի հանձնաժողովին՝ Երևանի ընդհանուր իրավասության դատարանի դատավոր Արտուշ Գաբրիելյանի նկատմամբ կարգապահական վարույթ հարուցելու եւ նրան կարգապահական պատասխանատվության ենթարկելու միջնորդությամբ բարձրագույն դատական խորհրդին դիմելու խնդրանքով:

Միհրան Պողոսյանը պաշտոնապես տեղեկացվել է, որ դատավորի նկատմամբ կարգապահական վարույթ է հարուցվել նշված` առանց պաշտպանական կողմի մասնակցության դատական նիստն անցկացնելու հիմքով, սակայն վարույթի արդյունքները հայտնի չեն։

Բացի այդ՝ Երևան քաղաքի ընդհանուր իրավասության դատարանի նշված որոշման դեմ ներկայացված վերաքննիչ բողոքի քննարկման ժամանակ փաստաբանը կեղծ փաստաթուղթ էր հայտնաբերել` «ՀԵՌԱԽՈՍԱԳԻՐ» վերտառությամբ: Ըստ նշված հեռախոսագրի` դեկտեմբերի 30-ին` ժամը 11։25-ին (միջնորդությունը դատավորին մակագրվելուց 11 րոպե անց), Դատարանի աշխատակազմը փորձել է կապ հաստատել Վահագն Հարությունյանի պաշտպանի հետ և տեղեկացնել, որ դատական նիստը նշանակված է նույն օրը ժամը 13։00-ին, սակայն  Միհրան Պողոսյանը հեռախոսազանգերին չի պատասխանել։ Վերջինս պնդում է, որ ինքն այդ օրը հեռախոսազանգ չի ստացել եւ պատրաստակամ  է ներկայացնել դա վկայող փաստաթղթեր: Նա համոզված է, որ այդպիսի հեռախոսազանգ ոչ միայն չի կատարվել, այլեւ հետագայում է  որպես կեղծ ապացույց զետեղվել վարույթի նյութերում, քանի որ  այն չի եղել, երբ  10.01.2019թ.  ծանոթացել է նյութերին:

Փաստաբանի գնահատմամբ՝ վարույթի նյութերում կեղծ հեռախոսագրի առկայությունն իր մեջ հանցագործության հատկանիշներ է պարունակում  եւ գրավոր հաղորդում է ներկայացրել ՀՔԾ՝ հանցագործության մասին, որի քննարկման արդյունքները եւս դեռ հայտնի չեն։

Աղբյուր` Փաստինֆո