Փաստ ինֆո

 «Երևան համայնքը հրաժարվում է «Հրապարակ» օրաթերթի հետ կնքված ոչ բնակելի տարածքի անհատույց օգտագործման պայմանագրից»։ Այս մասին թերթի խմբագրությունը տեղեկացվել է այսօր։ 

«Փաստինֆո»-ն հրապարակ թերթից տեղեկացավ, որ Երեւանի քաղաքապետն առաջարկել է խմբագրությանը ծանուցումը ստանալու պահից մեկ ամիս անց հնգօրյա ժամկետում ազատել տարածքը։ «Հայտնում եմ, որ համայնքային սեփականություն հանդիսացող գույքի արդյունավետ կառավարման նպատակով, ելնելով Երևան համայնքի շահերից ներկայումս Երևանի քաղաքապետարանում քննարկվում է Երևան համայնքի սեփականություն հանդիսացող և անհատույց օգտագործման իրավունքով տրամադրված տարածքների օգտագործման հիմնավորվածության հարցը, որի շրջանակներում նախատեսվում է դադարեցնել տարածքների անհատույց օգտագործումը և քննարկել վարձակալության սկզբունքով դրանց հետագա օգտագործման նպատակահարմարության հարցը»։

Խմբագրությունը պահանջել է քաղաքապետից՝ մանրամասն հիմնավորել, թե ո՞ր օրենսդրական ակտերով են ղեկավարվել տարածքն ազատելու պահանջներ ներկայացնելիս։ «Йնչպե՞ս եք պատկերացնում մեզ անխուսափելիորեն պատճառվող իրական վնասի չափը և այն հատուցելու պատասխանատվությունը, հասկանո՞ւմ եք արդյոք, որ այդպիսի հապճեպությունն ու ոչ իրավաչափ նախաձեռնությունը աղերսներ ունի զանգվածային լրատվության միջոցների հետապնդման հետ, գիտակցո՞ւմ եք արդյոք, որ «Հրապարակին» տարածքից վռնդելը հանրության կողմից ընկալվելու է որպես Ձեզ մշտապես քննադատող լրատվամիջոցին լռեցնելու քայլ»,- հայտարարել է խմբագրությունը

 2009 թվականին Երևանի ավագանու որոշմամբ Բուզանդի ⅓ շենքի 4-րդ հարկում գտնվող մոտ 90 քմ գրասենյակային տարածքը մինչև 14․02․2020 թվականը անհատույց տրվեց «Հրապարակ» թերթի խմբագրությանը։ Նախագահը Սերժ Սարգսյանն էր, վարչապետը Տիգրան Սարգսյանն էր, քաղաքապետը Գագիկ Բեգլարյանը։ «Քրեաօլիգարխիկ խորը ճահճում էինք ապրում-քննադատում իշխանությանը, բայց կար չգրված օրենք, որին ենթարկվում էր նաև իշխանությունը՝ թերթը իր եկամուտներով ի վիճակի չի տարածք վարձակալել։

Թերթին տնտեսապես նեղ վիճակում դնողն անմիջապես մեղադրվում էր ազատ խոսքը ճնշելու մեջ։ Նոր իշխանությունների ժամանակ թերթերի վիճակը չփոխվեց։ Լրագրող վարչապետը կարծես ամեն ինչ անում է իր նախկին կոլեգաների վիճակը ծանրացնելու համար»,- ասում են մեր գործընկերները։

Նշված շենքում են գտնվում նաեւ այլ խմբագրություններ, որոնք եւս ստացել են տարածքը լքելու ծանուցումներ։

Աղբյուր` Փաստինֆո