Փաստ ինֆո

«Սասնա ծռեր» համահայկական կուսակցության վարչության անդամ ժիրայր Սեֆիլյանը հայտարարություն է տարածել, որում նշել է, թե մի շարք լրատվականներ խեղաթյուրել են իր նախորդ հայտարարությունը և լրատվամիջոցներին հորդորել է զերծ մնալ ակնհայտ ստեր տարածելուց և պարզապես ընթերցել իր հայտարարությունը. «Մի՛ խեղաթյուրեք իմ խոսքը»։

Ավելի վաղ «Ժողովուրդ օրաթերթը գրել էր.  «Սեֆիլյանն իշխանությունների հասցեին սպառնալիքներ է հնչեցրել՝ բաց տեքստով հասկացնելով, որ հարկ եղած դեպքում կրկին կդիմեն զենքի։ Ի վերջո, «Սասնա ծռերը» բազմիցս ցույց է տվել՝ իրենք ամենևին չեն զղջում, որ իրենց պետական ահաբեկչություն հիշեցնող գործողություների հետևանքով զոհվել է երկու ոստիկան, ու արդարացնում են կատարվածը, իսկ հիմա նաև սպառնում:
«Սասնա ծռերի» անդամներն իրենց ապագա բանտարկությունը կանխելու համար փորձում են դիմադրել»

Անդրադառնալով այս տեսակետներին՝ Սեֆիլյանը նշել է. «Նրանք ուղիղ կամ անուղղակի կերպով ինձ վերագրում են այնպիսի արտահայտություններ, որոնք ես չեմ արել։ 
Օրինակ, ասում են, որ ես խոսել եմ ապստամբության անհրաժեշտության մասին և նույնիսկ նկատի եմ ունեցել, որ դա պետք է զենքով անել։ 
Դա մերկապարանոց հերյուրանք է»։

Հիշեցնենք, որ երեկ իր ֆեսբուքյան էջում մենաբանելով այն փաստը, որ «Սասնա Ծուռ» ապստամբներ Արմեն Բիլյանը և Սմբատ Բարսեղյանը հեղափոխությունից տասը ամիս անց շարունակում են մնալ բանտում, նա գրել էր. «Առնվազն տարակուսելի է, որ հեղափոխությամբ պետության ղեկը ստանձնած իշխանությունը, որ իրավմամբ շահագրգիռ է Մարտի 1-ի մեղավորներին բացահայտելու գործում, իր բոլոր քայլերով, այդ թվում՝ ծուղակ հիշեցնող անհեթեթ համաներման ակտով, համառորեն մերժում է Մարտի 1 արած ռեժիմի դեմ ապստամբության իրավունքը, իսկ ապստամբներին հանձնում է նրա ծառաների դատաստանին»։
Ապա ավելացրել էր, որ եթե նրանք չազատվեն, ժողովրդի առավել արժանապատիվ ու գիտակից հատվածը կպարտադրի ապստամբության իրավունքի ճանաչումն ու ապստամբների ազատությունը։

Աղբյուր` Փաստինֆո