Փաստ ինֆո

Երեւանի ընդհանուր իրավասության դատարանն ստացել է «Լիդիան Արմենիա» ընկերության հայցն ընդդեմ ԱԺ ԲՀԿ խմբակցության պատգամավոր Սերգեյ Բագրատյանի: «Փաստինֆո»-ի հաղորդմամբ` այն մակագրվել է դատավոր Գրիգոր Վարդանյանին:
 
«Լիդիան Արմենիա» ընկերությունը պահանջում է, որ պատգամավորը հերքի 17.02.2019թ. Ջերմուկի կրթահամալիրում տեղի ունեցած պատգամավորների ճանաչողական հանդիպման ընթացքում  ներկայացռած զրպատություն համարվող տվյալները ինչպես նաեւ փոխհատուցել պատճառված վնասի եւ դատական ծախսերի համար:
 
Ավելի վաղ տեղեկացրել ենք, որ  փետրվարի 17-ին Ջերմուկի կրթահամալիրում տեղի ունեցած հանդիպման ընթացքում Սերգեյ Բագրատյանը հայտարարել է, թե նախորդ իշխանությունները կաշառք են վերցրել «Լիդիան Արմենիա» ընկերությունից: «Ժողովուրդ ջան, հարցը շատ պարզ է, շատ տրիվիալ ճշմարտություն կա, լուրջ չէ որ մենք լուրջ վերաբերվենք, որովհետև նախորդ իշխանություններն իրենցից կաշառք վերցրել են և թույլ են տվել, ինչի մասին է խոսքը, ես հայտարարում եմ դա ամենայն պատասխանատվությամբ… », - ասել էր պատգամավորը, ինչն ընկերությունը պահանջում է հերքել:
 
Ընկերությունը պահանջում է, որ հերքումը հրապարակվի առնվազն 1000 տպաքանակ և ՀՀ ողջ տարածքում սպառում ունեցող որևէ տպագիր թերթում ՝վճիռն օրինական ուժի մեջ մտնելուց հետո մեկ շաբաթյա ժամկետում «Հերքում» խորագրի ներքո՝ հետևյալ բովանդակությամբ՝ «Սերգեյ Պապաշի Բագրատյանի կողմից 17.02.2019 թվականին Ջերմուկի կրթահամալիրում տեղի ունեցած պատգամավորների ճանաչողական հանդիպման ընթացքում հնչեցրած զրպարտություն համարվող այն տվյալները, որոնք վերաբերում են նախկին իշխանությունների կողմից «Լիդիան Արմենիա» ՓԲ ընկերությունից կաշառք վերցնելուն, չեն համապատասխանում իրականությանը»:
 
Ընկերությունը Սերգեյ Բագրատյանից զրպարտության համար պահանջել է նաև դրամական փոխհատուցում:

«Հարկ ենք համարում նշել, որ Ընկերությունը երկար ժամանակ դրսևորել է լայնախոհություն և հաճախ չի արձագանքել նման հայտարարություններին: Սակայն հետայսու չի հանդուրժելու որևէ մեկի կողմից Ընկերության հասցեին զրպարտության տարածումը և նման դեպքերում կդիմի համապատասխան իրավական քայլերի: Հրապարակային խոսքի հանդեպ պատասխանատվությունը ոչ միայն բարոյական, այլև իրավական կատեգորիա է ու զարմանալի է, որ այդ մասին կարիք կա հիշեցնելու իրենց քաղաքական գործիչ համարող անձանց», - հայտարարել է «Լիդիան Արմենիա» ընկերությունը:

Լուսանկարում` ԱԺ պատգամավոր Սերգեյ Բագրատյանը

Աղբյուր` Փաստինֆո