Փաստ ինֆո

«Փաստինֆո»-ն շարունակում է ներկայացնել , թե 2008 թ. մարտի 1-ին տեղի ունեցած զանգվածային անկարգությունների ժամանակ արձանագրված 10 զոհերից յուրաքանչյուրն ինչ հանգամանքներում է ստացել կյանքի հետ անհամատեղելի մարմնական վնասվածքները

Հովհաննիսյան Հովհաննես՝ ծնված 13.03.61 թվականին Երևան քաղաքում, նախկինում չդատված, անկուսակցական, մշտական աշխատանք չի ունեցել՝ զբաղվել է սանտեխնիկայի վերանորոգմամբ։

Նրա դին Երևանի թիվ 2 բժշկական կենտրոն է տեղափոխվել՝ 2008թ. մարտի 1-ին` ժամը 21.40-ի սահմաններում, կրծքավանդակի հրազենային վնասվածքով։

Ով՝ որտեղ և ինչ հանգամանքներում է ստացել կյանքի հետ անհամատեղելի վնասվածքները 2008 թվականի մարտի 1-ին

Դիակի դատաբժշկական փորձաքննության եզրակացության համաձայն՝ Հովհաննես Հովհաննիսյանի դիակի վրա հայտնաբերվել է հրազենային գնդակային կույր վնասվածք՝ կրծքավանդակի ձախ կեսի առաջային մակերեսին: Մահը վրա է հասել կրծքավանդակի հրազենային գնդակային կույր վիրավորումից առաջացած սուր ներքին արյունահոսությունից:

Դիահերձման ժամանակ Հ.Հովհաննիսյանի մարմնից հանվել է 5,45մմ տրամաչափի 1 գնդակ: Դատաձգաբանական փորձաքննության եզրակացության համաձայն՝ Հովհաննես Հովհաննիսյանի դիակից հանված գնդակը գործարանային արտադրության, 5,45մմ տրամաչափի մարտական փամփուշտի մաս կազմող կրակված գնդակ է: Այս տեսակի փամփուշտները նախատեսված են «ԱԿ-74» ինքնաձիգների և դրանց մոդիֆիկացիաների համար: Գնդակն իր վրայի կրակման հետքերով բնորոշ է 5.45 մմ տրամաչափի «ԱԿ-74» ՚ինքնաձիգներից և դրանց մոդիֆիկացիաներից կրակված գնդակներին: Դատաձգաբանական և դատաքիմիական համալիր փորձաքննության եզրակացության համաձայն՝ Հովհաննես Հովհաննիսյանի հագուստների վրա հայտնաբերված վնասվածքները հանդիսանում են միմյանց շարունակությունը կազմող հրազենային-գնդակային մուտքի կույր վնասվածքներ, պատճառվել են զենքից մեկ կրակոցով արձակված պղինձ պարունակող 5,45մմ տրամաչափի գնդակով: Դատարանի համապատասխան որոշման հիման վրա ստացվել և ուսումնասիրվել են Հովհաննես Հովհաննիսյանի բջջային հեռախոսահամարի մուտքային և ելքային զանգերի վերծանումները: Կատարված նախաքննությամբ պարզվել է, որ Հովհաննես Հովհաննիսյանը ժամը 20-ի սահմաններում ալկոհոլ օգտագործած վիճակում գտնվել է Մյասնիկյանի արձանի մոտ: Ժամը 21-ի սահմաններում զանգվածային անկարգությունների մասնակիցների հետ, փայտը ձեռքին գնացել է դեպի Մաշտոցի պողոտայի և Գր. Լուսավորչի փողոցի խաչմերուկ, որտեղ ստանալով հրազենային վնասվածք՝ մահացել է:

Էջմիածին քաղաքի բնակիչ Հրանտ Հակոբյանը մի կնոջ հետ, իրեն պատկանող ՎԱԶ-2106 մակնիշի, 12 ՏՏ 664 պետհամարանիշի ավտոմեքենայով Հովհաննես Հովհաննիսյանի դիակը տեղափոխել է Երևանի թիվ 2 բժշկական կենտրոն: Նշված հանգամանքները պարզվել են հարցաքննված շուրջ 20 անձանց, այդ թվում՝ Հրանտ Հակոբյանի, Հովհաննես Հովհաննիսյանի վիրավորումը ստացած ականատես վկաներ Գեղամ Պետրոսյանի և Կարապետ Հովհաննիսյանի ցուցմունքներով, Հովհաննես Հովհաննիսյանի մարմնական վնասվածք ստանալու տեղանքի զննման արձանագրությունով:

2008 թվականին ՀՀ ոստիկանությանը և ազգային անվտանգության ծառայությանը տրվել են հանձնարարություններ` Հովհանես Հովհաննիսյանի վիրավորվելուն ականատես այլ անձանց հայտնաբերելու, մեղավորի ինքնությունը պարզելու և նրան հայտնաբերելու ուղղությամբ օպերատիվ միջոցառումներ ձեռնարկելու վերաբերյալ:

6 ամիս առաջ՝ 2018 թվականի օգոստոսի 17-ին ՀՀ վարչապետ Նիկոլ Փաշինյանը հայտարարեց, որ «Մարտի 1-ի գործը, ըստ էության, բացահայտված է», սակայն հանրությանն առայժմ հայտնի չէ թե իշխանափոխությունից հետո ինչ նոր հանգամանք է պարզվել, հայտնաբերվել է արդյոք հրազեն կիրառած անձը։ ՀՔԾ-ն այդ մասին լռում է։ 

Շարունակելի

Աղբյուր` Փաստինֆո