Փաստ ինֆո

ՀՀ Աժ պատգամավոր Էդուարդ Բաբայանի գործը մուտք է եղել Երեւանի ընդհանուր իրավասության դատարան եւ մակագրվել  դատավոր Մեսրոպ Մակյանին: Այս մասին «Փաստինֆո»-ն տեղեկացավ «Դատալեքս» դատական-տեղեկատվական համակարգից։ Մեղադրական եզրակացության համաձայն՝ Էդուարդ Բաբայանին մեղադրանք է առաջադրվել այն բանի համար, որ նա 2018թ․ հուլիսի 2-ին Երևան քաղաքի Միկոյան փողոցի 51 հասցեում գտնվող «Օլիմպավան» մարզական համալիրի հանդիպումների դահլիճում հարվածներ է հասցրել բռնցքամարտի աշխարհի երիտասարդական առաջնության ոսկե մեդալակիր Նիկոլայ Հարությունովի հորը՝ Վյաչեսլավ Հարությունովին՝ առողջությանը դիտավորությամբ պատճառելով ծանր վնաս։

«Փաստինֆո»-ի հաղորդմամբ՝ ի սկզբանե  Էդուարդ Բաբայանին մեղադրանք էր առաջադրվել ՀՀ քրեական օրենսգրքի 112-րդ հոդվածի 2-րդ մասի 6-րդ կետով` ծանր մարմնական վնասվածքի պատճառում մի խումբ անձանց կողմից։ 2018 թվականի հուլիսին Քննչական կոմիտեն հայտարարեց, որ գործն ուղարկել են ՀՔԾ, քանի որ «ձեռնարկված միջոցառումների արդյունքում տվյալներ են ձեռք բերվել քաղաքացու նկատմամբ կիրառված բռնությանը ԱԺ պատգամավոր Գագիկ Ծառուկյանի հնարավոր մասնակցության վերաբերյալ»։

Ազատազրկվելու դեպքում ԱԺ պատգամավոր Էդուարդ Բաբայանի լիազորությունները կդադարեցվեն. անձեռնմխելիությունը նրա վրա չի տարածվում

Հատուկ քննչական ծառայությունում կատարված քննության արդյունքում մեղադրանքը փոխվեց եւ մեղադրանք առաջադրվեց միայն ՀՀ քրեական օրենսգրքի 112-րդ հոդվածի 1-ին մասով, այն է` ծանր մարմնական վնասվածք պատճառելը՝ մասնակիցների շրջանակը սահմանափակելով միայն Էդուարդ Բաբայանով։

Նշենք, որ Էդուարդ Բաբայանը համարվել է Գագիկ Ծառուկյանի թիկնապահը եւ մշտապես նրան ուղեկցել հանդիպումների ժամանակ։ Քննության ընթացքում Էդուարդ Բաբայանը սակայն ներկայացել է որպես Գագիկ Ծառուկյանի խորհրդական։ Իսկ հարուցված քրեական գործն էլ չխանգարեց, որ նա առաջադրվի որպես պատգամավորի թեկնածու եւ ընտրվի պատգամավոր։

Ազատազրկվելու դեպքում ԱԺ պատգամավոր Էդուարդ Բաբայանի լիազորությունները կդադարեցվեն։

Աղբյուր` Փաստինֆո