Փաստ ինֆո

«Մարտի 1-ի գործը, ըստ էության, բացահայտված է», - 6 ամիս առաջ՝ 2018 թվականի օգոստոսի 17-ին, հայտարարեց ՀՀ վարչապետ Նիկոլ Փաշինյանը։ Սակայն առ այսօր ՀՔԾ-ն որևէ տեղեկատվություն չի տրամադրել  կոնկրետ բռնի գործողություններ կատարելու համար մեղադրանքներ առաջադրելու մասին։

Առայժմ տեսանելի է գործի քաղաքական կողմը. Սահմանադրական կարգը տապալելու համար մեղադրանք է առաջադրվել 2008 թվականի իշխանություններին՝ 4 բարձրաստիճան պաշտոնյայի՝  ընդ որում` ՀՀ քրեական օրենսգրքի այն հոդվածով, որը 2008 թվականի մարտի 1-2-ին գոյություն չի ունեցել: Թերեւս բացահայտում ասելով վարչապետը դա է նկատի ունեցել կամ էլ ՀՔԾ-ն լիարժեք չի ներկայացրել վարչապետին գործի հանգամանքները։ Ի վերջո «անկախ» մարմին է եւ հաշվետու չէ, համենայն դեպս հաշվետու չպետք է լինի կառավարությանը, վարչապետին։ Առավել ևս, երբ Նիկոլ Փաշինյանը հայտարարել էր, որ  «չի պատրաստվում ՀՀ վարչապետի կարգավիճակում լինել և՛ դատախազ, և՛ դատավոր, և՛ քննիչ, և՛ ՔԿՀ պետ և այլն»։ Թեև հանուն ճշմարտության նկատենք, որ այս հայտարարությունը Փաշինյանը հնչեցրել էր նախքան վարչապետ ընտրվելը։

Հանրությանն առայժմ հայտնի չէ թե  10 զոհերի համար իշխանափոխությունից հետո որեւէ մեկին մեղադրանք առաջադրվել է, թե ոչ. ՀՔԾ-ն այդ մասին լռում է։

Օգտվելով բաց աղբյուրներից հասանելի տեղեկատվությունից՝ «Փաստինֆո»-ն կներկայացնի, թե նրանցից յուրաքանչյուրն ինչ հանգամանքներում է մահացել։

Ֆարմանյան Արմեն՝ 25.11.1974 թվականին, Երևան քաղաքում, նախկինում դատված՝ ավազակային հարձակում կատարելու համար, բժշկական կենտրոն է տեղափոխվել՝ 2008թ. մարտի 1-ին` ժամը 22-ի սահմաններում, գլխի շրջանում հրազենային վնասվածքներով:

Դիակի դատաբժշկական փորձաքննության եզրակացության համաձայն՝ Արմեն Ֆարմանյանի դիակի վրա հայտնաբերվել է գլխի ձախ կեսի կողմնա-քունքային շրջանի սալջարդ վերք՝ ոսկրա-հյուսվածքային դեֆեկտով, գանգաթաղի և հիմի ոսկորների բաց կոտրվածքներ, գլխուղեղի ջնջխում` մասնակի արտաթափումով, որոնք էլ անմիջական պատճառական կապի մեջ են գտնվել նրա մահվան հետ: Դիահերձման ժամանակ գանգից հանվել են օտար մարմիններ, որոնք առգրավվել են: Դատաձգաբանական փորձաքննության եզրակացության համաձայն՝ Արմեն Ֆարմանյանի դիակից հանված պլաստմասսե և մետաղյա մեկական կտորները գործարանային արտադրության «Չերյոմուխա – 7» տեսակի կրակված փամփուշտի գազային նռնակ է՝ առանձնացած մեկ խցանով: Խցանի վրայի կրակման հետքերը բնորոշ են հատուկ միջոց հանդիսացող «ԿՍ-23» կարաբիններին: Խցանի գլխային մասի վրա առկա դեֆորմացիան և պատռվածքները կարող էին առաջանալ որևէ պինդ մարմնի հետ բախման կամ որևէ արգելքի միջով անցնելու հետևանքով: Կատարված նախաքննությամբ պարզվել է, որ Արմեն Ֆարմանյանը, ՀՀ ԱԺ պատգամավոր Հակոբ Հակոբյանի ներգրավմամբ, որոշ մանսկացություն է ունեցել զանգվածային անկարգություններին: Ժամը 21-ի սահմաններում՝ Պարոնյան փողոցի թիվ 24 դպրոցի դիմաց Արմեն Ֆարմանյանն ստացել է վնասվածք և տեղում մահացել: Արմեն Ֆարմանյանի մտերիմ Աշոտ Վարդանյանը և մի խումբ այլ անձինք նրա դիակը ՎԱԶ-2109 մակնիշի, 09 ՕԼ 237 պետհամարանիշի ավտոմեքենայով տեղափոխել են Լեոյի 7 շենքի մոտ, որտեղ տեղադրել են «Շտապ բուժօգնություն» ՊՓԲԸ թիվ 003 բրիգադի շտապօգնության ավտոմեքենան, որն էլ տեղափոխել է դիահերձարան: Նշված հանգամանքը պարզվել է հարցաքննված շուրջ 15 անձանց, այդ թվում` Աշոտ Վարդանյանի, Բագրատ Ուզունյանի, թիվ 003 բրիգադի շտապօգնության ավտոմեքենայի վարորդ Լյովա Խոջոյանի, բժշկուհի Մարիաննա Ալիխանովայի, բուժքույր Աննա Մխիթարյանի ցուցմունքներով, լուսանկարով Աննա Մխիթարյանին ճանաչման ներկայացնելու արձանագրությունով, Լյովա Խոջոյանի մասնակցությամբ` Արմեն Ֆարմանյանի դիակը շտապօգնության մեքենան տեղադրելու վայրի զննության արձանագրությամբ:

Մինչև իշխանափոխությունը կատարված քննությամբ պարզվել էր «Չերյոմուխա – 7» տեսակի հատուկ միջոց կիրառած ոստիկանների շրջանակը, սակայն հնարավոր չէր եղել նույնականացնել փամփուշտը։ Անգամ միջազգային փորձագետներն էին ասել, որ հնարավոր չէ։ ՀՀ ոստիկանությանը և ազգային անվտանգության ծառայությանը տրվել են հանձնարարություններ` Արմեն Ֆարմանյանի վիրավորվելուն ականատես անձանց հայտնաբերելու, մեղավորի ինքնությունը պարզելու և նրան հայտնաբերելու ուղղությամբ օպերատիվ միջոցառումներ ձեռնարկելու վերաբերյալ:

Շարունակելի

Աղբյուր` Փաստինֆո