Փաստ ինֆո

Ազգային անվտանգության խորհրդի նախկին քարտուղար Արմեն Գևորգյանի փաստաբան Էրիկ Ալեքսանյանը «Փաստինֆո»-ին տեղեկացրեց, որ այսօր իրենք կդիմեն Վճռաբեկ դատարան, ինչպես նախկինում, այնպես էլ հիմա` վիճարկելու Առաջին ատյանի դատարանի եւ Վերաքննիչ դատարանի կայացրած որոշումը, ըստ որով` Արմեն Գեւորգյանը առնչություն ունի իրեն վերագրվող փողերի լվացման դրվագի հետ:

Փաստաբանը շեշտեց, որ իրենց համոզմամբ Գեւորգյանը ոչ մի առնչություն չունի, եւ ներկայացված փաստական տվյալները դրա մասին որեւէ ողջամիտ ենթադրություն չեն առաջացնում: Նա նշեց նաև, որ դատարանի արձանագրած մյուս երկու մեղադրանքները, որոնց համաձայն` առկա չէ կոնկրետ հիմնավոր կասկած, որ Արմեն Գեւորգյանը առնչություն ունի իրեն վերագրվող հանցավոր արարքների հետ, իրենք համարում են արդար դատական ակտեր:

Ի պատասխան մեր հարցին, թե ինչպես են գնահատում նախաքննության ավարտի փուլում նորից կալանավորման հարց բարձրացնելու հանգամանքը, փաստաբանը նշեց, որ թեեւ օրենսդրական տեսանկյունից քրեական հետապնդման մարմինը որեւէ կաշկանդվածություն չունի, անկախ այն բանից` գործը գնում է դատարան թե ոչ, բայց իրենք տարակուսելի են համարում նման բողոքներ կայացնելը, որովհետեւ վերջերս մեղադրանքը ոչ որակական տեսանկյունից փոփոխվել է, եւ հիմա հին մեղադրանքով Վճռաբեկ բողոք ներկայացնելը այնքան էլ ողջամիտ չէ. «Նրանք վիճարկելու են դատարանի կողմից հիմնավոր կասկածի բացակայության արձանագրման փաստը, ինչը որ ես անիմաստ եմ համարում, որովհետեւ Առաջին ատյանի դատարանը եւ Վերաքննիչ դատարանը, ինչպես արդեն նշեցի, կայացրել են արդար դատական ակտեր»,- նշեց Ալեքսանյանը:

Նա նաեւ ոչ բավարար համարեց գործին ծանոթանալու համար տրամադրված 50 օրը. «76 օր ժամկետը նշելը մեր կողմից ինքնանպատակ չէր, այն բխում էր ՀՀ-ում քրեական գործերով ձեւավորված ավանդույթից, ըստ որի` յուրաքանչյուր հատորի համար սովորաբար տրվում է մեկից երկու օր, այսինքն` եթե հաշվարկենք, կստացվի նվազագույնը 76 օր, ինչը որ վարույթ իրականացնող մարմինը սահմանափակեց 50-օրյա ժամկետով»: Փաստաբանը սա անընդունելի է համարում և նշում է, որ որոշումը ստանալուց հետո դատավարական ընթացակարգի համաձայն անպայման կբողոքարկեն:

Հիշեցնենք, որ Արմեն Գեւորգյանը մեղադրվում է ՀՀ քրեական օրենսգրքի 38-300.1-րդ հոդվածի 1-ին մասով, 311-րդ հոդվածի 4-րդ մասի 2-րդ կետով եւ 190-րդ հոդվածի 3-րդ մասի 1-ին կետով` ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու եւ հանցավոր ճանապարհով ստացված գույքն օրինականացնելու մեջ: Նրա նկատմամբ, որպես խափանման միջոց է ընտրված չհեռանալու մասին ստորագրությունը։

Աղբյուր` Փաստինֆո