Փաստ ինֆո

Փետրվարի 14-ին ավարտվեց Ազգային ժողովի նախկին պատգամավոր Մանվել Գրիգորյանի և նրա կնոջ՝ Նազիկ Ամիրյանի վերաբերյալ քրեական գործի նախաքննությունը:

Ավելի քան ութ ամիս տևած նախաքննությունից հետո Հատուկ քննչական ծառայությունը տեղեկացրեց, որ Գրիգորյանի մեղադրանքը լրացվել է։ Նա այժմ մեղադրվում է ապօրինի կերպով զենք-զինամթերք պահելու, ավելի քան 101 միլիոն դրամի գույք յուրացնելու, ավելի քան 1 միլիարդ դրամի հարկերի վճարումից խուսափելու, պետական միջոցներից ավելի քան 1 միլիարդ դրամ վատնելու և շորթմամբ 37 միլիոն դրամ արժողությամբ գույքի հափշտակությունը կազմակերպելու մեջ: Մանվել Գրիգորյանի որդու` Արման Գրիգորյանի նկատմամբ հայտարարվել է հետախուզում:

Գրիգորյանի պաշտպան Արսեն Մկրտչյանը «Փաստինֆո»-ի հետ զրույցում նշեց, որ իրենք` փաստաբանական խմբի կազմով, երեկ որոշում են կայացրել այս փուլում լրագրողներին որեւէ տեղեկություն չտրամադրել. «Երբ սկսենք խոսել, ես լրացուցիչ կհայտարարեմ, բայց էլի եմ ասում` մինչ գործի դատարան հասնելը նշանակալից թե աննշան տեղեկություն չենք տալու:»

Պաշտպանը չնշեց նաեւ, թե ինչ ժամկետ են խնդրել` գործին ծանոթանալու համար. «Եթե ՀՔԾ-ն կհրապարակի, թող հրապարակի, դա իրենից գաղտնիք չի պարունակում, բայց մեզ համար գաղտնիք է, մենք որոշել ենք չհրապարակել»: Միեւնույն ժամանակ Արսեն Մկրտչյանը ընդգծեց, որ ինքն անձամբ գործի մեջ է եւ մինչեւ վերջ էլ լինելու է` անկախ այն բանից, թե ընթացակարգում ինչ փոփոխություն կլինի. «Հանրությունը կարող է հանգիստ լինել այն առումով, որ օրենքով սահմանված կարգով գործընթացները շարունակվում են, իրավական բոլոր ընթացակարգերը` պահվում: Պարզապես հիմա լրագրողական դադար ենք տալիս»:

Մկրտչյանը հավելեց, որ հնարավոր է միայն մեկ-երկու հաղորդում լինի Մանվել Գրիգորյանի առողջական վիճակի մասին: Ի պատասխան մեր հարցին, թե ինչ վիճակում է այժմ Գրիգորյանը, պաշտպանը նշեց, որ շնորհիվ Նաիրի բ/կ-ի բժիշկների տաղանդի` Գրիգորյանի մոտ կայուն բարդ վիճակ է. «Ոչ թե դեպի լավը տեղաշարժ կա, այլ դեպի վատը չկա, իսկ վատը մեր դեպքում շատ վատն է»:

Աղբյուր` Փաստինֆո