Փաստ ինֆո

ՀՀ երկրորդ նախագահ Ռոբերտ Քոչարյանի, նախկին բարձրաստիճան պաշտոնյաներ  Արմեն Գեւորգյանի, Սեյրան Օհանյանի եւ Յուրի Խաչատուրովի փաստաբաններն սկսել են ծանոթանալ գործի նյութերին: Հիշեցնենք, որ նախօրեին Հատուկ քննչական ծառայությունը հայտարարեց նշված պաշտոնյաների մասով նախաքննության ավարտի մասին: Քրգործը ընդհանուր առմամբ 76 հատոր է, որին ծանոթանալու համար բավական երկար ժամանակ կպահանջվի. տրամաբանությունը հուշում է, որ առնվազն է պետք կլինի 2 ամիս:
 
Թե ինչ ապացույցներ են դրված մեղադրանքների հիմքում ցույց  կտա դատաքննությանը ընթացքը: Իսկ առայժմ, հիմք ընդունելով ՀՔԾ-ի պաշտոնական հրապարակած տվյալները, կարող ենք փաստել, որ  2008 թվականի մարտի 1- 2-ին տեղի անկարգությունների ժամանակ 10  զոհերի համար պաշտոնյաներից որեւէ մեկին մեղադրանք չի առաջադրվել:
 
Սահմանադրական կարգը տապալելու համար մեղադրանք է առաջադրվել այդ օրվա իշխանություններին, ընդ որում` ՀՀ քրեական օրենսգրքի այն հոդվածով, որը 2008 թվականի մարտի 1-2-ին գոյություն չի ունեցել:
 
Նախաքննական մարմինը եւ դատարաններն առանձնահատուկ վերաբերմունք են դրսեւորել Նախագահ Քոչարյանի նկատմամբ` նրան պահելով կալանքի տակ: Նկատենք, որ մեղադրյալի կարգավիճակում գտնվող  4 պաշտոնյաներից միայն  Ռոբերտ Քոչարյանն է գտնվում կալանքի տակ` չնայած, որ միայն նա ունի սահմանադրական անձեռնմխելիություն: Ավելին` դատարաններն այդպես էլ իրենց մեջ ուժ չգտան` դիմելու Սահմանադրական դատարան` Նախագահի ինստիտուտի սահմանադրական անձեռնմխելիության հարցը պարզաբանելու համար:
 
Ավելի վաղ տեղեկացրել ենք, որ Ռոբերտ Քոչարյանը մեղադրվում է ՀՀ քրեական օրենսգրքի 300.1-րդ հոդվածի 1-ին մասով և 311-րդ հոդվածի 4-րդ մասի 2-րդ մասով` ՀՀ սահմանադրական կարգը տապալելու և առանձնապես խոշոր չափերով կաշառք ստանալու մեջ, Սեյրան Օհանյանը եւ Յուրի Խաչատուրովը` ՀՀ քրեական օրենսգրքի 300.1-րդ հոդվածի 1-ին մասով` ՀՀ սահմանադրական կարգը տապալելու մեջ, իսկ Արմեն Գևորգյանը`ՀՀ քրեական օրենսգրքի 38-300.1-րդ հոդվածի 1-ին մասով, 311-րդ հոդվածի 4-րդ մասի 2-րդ կետով և 190-րդ հոդվածի 3-րդ մասի 1-ին կետով` ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և  հանցավոր ճանապարհով ստացված գույքն օրինականացնելու մեջ:

Աղբյուր` Փաստինֆո