Փաստ ինֆո

Հանրապետությունում առկա բոլոր թափուր աշխատատեղերի վերաբերյալ պետք է ունենանք ամփոփ պատկերացում:

Այդ մասին կառավարության նիստի սկզբում հայտարարեց ՀՀ վարչապետ Նիկոլ Փաշինյանը:

«Մեզ ոչ միայն թիվ է պետք, այլ թիվ, հասցե, աշխատավարձ, և այս տեղեկությունը՝ պետք է հանրությանը հասանելի լինի, թե որտեղ ինչ աշխատատեղ կա, ինչ աշխատավարձով»,-  ասաց Փաշինյանը՝ ընդգծելով, որ պետք է լրջորեն մտածել մեր քաղաքացիների աշխատանքային իրավունքների պաշտպանության մասին:

Փոխվարչապետ Տիգրան Ավինյանը նշեց, որ արդեն իսկ վարչապետի հետ քննարկել են թափուր աշխատատեղերի և կենտրոնների զարգացման հարցը: «Ծրագիրը մշակման փուլում է, և մյուս շաբաթ ունենալու ենք քննարկում նախնական կոնցեպտի վերաբերյալ, որը կոչվելու է «Աշխատիր, Հայաստան»: Այստեղ կցանկանայի նաև նշել, որ հարցը կոմպլեքս լուծում է ստանալու, մի քանի կետերով, որոնք Դուք նշեցիք, դրանք վերաբերում էին թափուր աշխատատեղերի ընդհանուր տեղեկատվական կենտրոնին, կարողությունների զարգացմանը: Դրանք իրականացվելու են միասնական մի ծրագրի շրջանակում, և ես կարծում եմ, որ այստեղ ունենք լայն հնարավորություններ աշխատելու, որովհետև գործազրկության բարձր մակարդակի հետ համատեղ ունենք բավականին մեծ քանակի թափուր աշխատատեղեր, և այս համընկնումն է, որ դեռևս չկա և պետք է մոտեցնել, որպեսզի գործազրկության քանակը կրճատվի, ինչպես նաև այդ թափուր աշխատատեղերն արագ համալրվեն համապատասխան կադրերով: Սա է լինելու մեր նպատակը»,- ասաց փոխվարչապետը:

Նիկոլ Փաշինյանը հավելեց, որ բավականին ֆիզիկական կարողություններ կան Աշխատանքի և սոցիալական հարցերի նախարարությունում, խնդիրն այդ ֆիզիկական կարողությունների բովանդակությունը կոնկրետացնելն է և էֆեկտիվ օգտագործելը: «Վերջերս այս թեմայի հետ կապված մի խնդիր էինք քննարկում Կրթության և գիտության նախարարի հետ: Տեսեք, մենք ինչ խնդիր ունենք, հիմա պետք է պետպատվերի տեղերը սահմանվեն բարձրագույն կրթության ոլորտում: Տարբեր բուհերից գալիս են հայտեր, և պարզ չէ, թե այդ հայտն ինչի հիման վրա է կառուցվել: Այսինքն՝ դրա տակ որևէ հաշվարկ և վերլուծություն չկա: Մեծ հաշվով համաձայն եմ՝ այս ամենը համակարգային խնդիր է լուծելու: Առանձին ուղղություններով աշխատանքները թող սկսեն, մենք շարունակաբար կհամակարգենք»,- նշեց կառավարության ղեկավարը:

Աղբյուր` Փաստինֆո