Փաստ ինֆո

«Պարտեզ» ռեստորանային համալիրի վրա կատարված զինված հարձակմանն առնչություն ունեցած անձանց թվում քիչ են նաեւ քրեական անցյալ ունեցողները։ «Փաստինֆո»-ն ավելի վաղ տեղեկացրել է, որ մասնակիցների թվում է եղել նաեւ «Բարեց Վահրամ» մականունով հայտնի Վահրամ Գրիգորյանն իր եղբայրների հետ միասին։ Հենց վերջիններս են աշխատացնում ԲՀԿ նախագահ Գագիկ Ծառուկյանի ընտանիքին պատկանող «Մուլտիտրանսսերվիս» ընկերության այն ավտոտեխսպասարկման կետը, որտեղից սկսվել էր ողբերգական ավարտ ունեցած վեճը։

Ինչպես ավելի վաղ տեղեկացրել ենք՝ ԱԺ նախկին պատգամավոր Մելիք Մանուկյանի եղբոր որդին իր ընկերոջ հետ հունվարի 28-ի երեկոյան նշված ընկերության ավտոտեխսպասարկման կենտրոնում խնդրել է նորոգել ավտոմեքենայի անիվը, որտեղ տարբեր պատճառաբանություններով՝  աշխատակցի տեղում չլինելու, ապա նաեւ աշխատանքային ժամն ավարտված լինելու պատճառով հրաժարվել են սպասարկել։

Առաջացել է վիճաբանություն, ինչը վերածվել է քաշքշոցի։ Մելիք Մանուկյանի զարմիկը հեռացել է՝ ուղեւորվելով ռեստորան, որտեղ հավաքված են եղել իրենց այլ հարազատներ եւ ընկերներ։ Քիչ անց՝ արդեն լույս հունվարի 29-ի գիշերը ռեստորան են գնացել մի խումբ զինված անձինք՝ պարզաբանումների։ Նրանց թվում եղել են «Թաթ» մականունով հայտնի Արթուր Վարդանյանը, ով Ծառուկյանի մոտ աշխատել է որպես անվտանգության աշխատակից, «Բարեց Վահրամը» եւ այլք։  Ռեստորանի մուտքի մոտ հնչել են կրակոցներ, որի հետեւանքով ստացած վնասվածքներից մահացել է երկու անձ՝ Մելիք Մանուկյանի զարմիկի ընկերը՝ 1989 թ. ծնված Արտաշես Գեւորգյանը եւ  21-ամյա Ջիվան Հարությունյանը։ Ընդ որում՝ Ա. Գևորգյանը մահացել էր նույն օրը՝ կրծքավանդակի շրջանում ստացած վնասվածքներից, իսկ Ջիվան Հարությունյանը վիրավորվել էր գլխի շրջանում։ 12 օր բժիշկները պայքարեցին նրա կյանքի համար, բայց անարդյունք. Փետրվարի 10-ին հայտնի դարձավ, որ երիտասարդը, ով սովորում էր համալսարանում, մահացել է։

«Փաստինֆո»-ի տեղեկություններով՝  «Բարեց Վահրամի» մասնակցությամբ սա առաջին արյունոտ պարզաբանումը չէ, որը նման ողբերգական ավարտ է ունեցել։ Տարիներ առաջ՝ Վահրամ Գրիգորյանը դանակահարել եւ սպանել է իր աշակերտուհու եղբորը, եւս երկու հոգու ծանր մարմնական վնաս պատճառել։ Սակայն նրան հաջողվել է խուսափել պատասխանատվությունից՝ դատապարտվելով ընդամենը 2 տարվա ազատազրկման եւ տուգանքի։ Իսկ ինչից է ծագել այդ վիճաբանությունը։

Դեպքը տեղի է ունեցել 2007 թվականի դեկտեմբերին, երբ Վահրամ Գրիգորյանն աշխատելիս է եղել  Աբովյան քաղաքի թիվ 5 միջնակարգ դպրոցում որպես ֆիզկուլտուրայի ուսուցիչ։  

2007թ. նոյեմբերի 30-ին ուսուցիչ Մարգարյանը  բռնություն է գործադրել  5-րդ դասարանի աշակերտուհու նկատմամբ՝ ձգել ականջը: Կատարվածի մասին աղջիկը պատմել է տանը, ինչին ներկա է եղել նաեւ հորեղբոր որդին՝ Գևորգ Զաքարյանը։ Վերջինս ավելի ուշ ընկերների հետ գնացել է ֆիզկուլտուրայի ուսուցիչ, «Բարեց Վահրամին» հանդիպելու։ Ընկերներն սպասել են հեռվում, իսկ Գեւորգը խոսել է նրա հետ։ Պարզաբանումները վերածվել են քաշքշոցի, ապա ծեծկռտուքի, որի ժամանակ «Բարեց Վահրամը» դանակահարել է բոլորին՝ Գեւորգ Զաքարյանին հարվածել է կրծքավանդակի հատվածում եւ սպանել, իսկ նրա ընկերներին պատճառել ծանր մարմնական վնասվածքներ։ Սակայն նա այդպես էլ պատասխանատվության չի ենթարկվել սպանության համար։ Դատավճռից «Փաստինֆո»-ն տեղեկացավ, որ Վահրամ Մարգարյանի արարքը որակվել է ամենամեղմ հոդվածներով՝ անհրաժեշտ պաշտպանության սահմանազանցմամբ սպանություն եւ ծանր մարմնական վնասվածքի պատճառում եւ մեղադրանք առաջադրվել ՀՀ քրեական օրենսգրքի 108-րդ և 116-րդ հոդվածներով։ Առաջին ատյանի դատարանը նրան դատապարտել է 3 տարվա ազատազրկման, սակայն վերաքննիչ դատարանը դա էլ է շատ համարել եւ մեղմացրել պատիժը՝ սպանության համար դատապարտելով երկու տարվա ազատազրկման, իսկ ծանր մարմնական վնասվածքի համար սահմանել 200 հազար դրամի տուգանք։ Նշենք, որ տուժողները զինված չեն եղել։ Համենայն դեպս՝ դատավճռում որեւէ խոսք չկա տուժածների մոտ զենքի առկայության մասին։

«Բարեց Վահրամի» հովանավորի ազդեցությունը կշարունակի գործել արդյոք նաեւ Նիկոլ Փաշինյանի կառավարության օրոք՝ ցույց կտա ապագան։ Զինված հարձակման զոհ դարձած երկու երիտասարդների սպանության համար մեղադրանք առայժմ չի առաջադրվել։

Աղբյուր` Փաստինֆո