Փաստ ինֆո

Վերաքննիչ քրեական դատարանի դատավորն իր վերջնական որոշման մեջ կոպտորեն խախտեց օրենքը եւ շարունակեց կալանքի տակ պահել պարոն Քոչարյանին՝ անտեսելով վարույթն իրականացնող մարմնի թույլ տված մի շարք շատ կոպիտ խախտումներ։ Այս մասին, այսօր՝ փետրվարի 9-ին, մամուլի ասուլիսի ժամանակ նշեց ՀՀ երկրորդ նախագահ Ռոբերտ Քոչարյանի պաշտպան Հայկ Ալումյանը՝ նշելով, որ դատարանի որոշումը բողոքարկելու են եւ բողոք ներկայացնելու են ոչ միայն վճռաբեկ դատարան, այլ նաեւ ՄԻԵԴ։

Որպես խախտման դրսեւորում Հայկ Ալումյանն անդրադարձավ 7 անձի ավելի 2008 թվականին սահմանադրական կարգի տապալելու համար առաջադրված մեղադրանքին։ Նա փաստեց,որ 2009-ին քրեական օրենսգրքի համապատասխան հոդվածը փոխվեց եւ հիմա սահմանադրական կարգի տապալումը նախատեսված է 300.1 հոդվածով: Այդ փոփոխության արդյունքում այդ 7 հոգու նկատմամբ քրեական հետապնդումը այդ մասով դադարեցվեց այն պատճառաբանությամբ, որ 300.1 հոդվածը խստացնում է անձի վիճակը, հետեւաբար քրեական իրավունքի հանրաճանաչ սկզբունքից ելնելով, այդ 7 հոգին խուսափեցին քրեական պատասխանատվությունից՝ սահմանադրական կարգի տապալման համար: Քրեական հետապնդումից խուսափեց նաեւ մեր հարգարժան Նիկոլ Փաշինյանը:

Մեր փաստարկներից մեկն այն էր, որ նույն ստանդարտը պետք է կիրառվի նաեւ պարոն Քոչարյանի նկատմամբ: Չի կարող Քոչարյանի դեպքում հակառակ մոտեցումը կիրառվել»,-հայտարարեց պաշտպանը:

Նա նշեց, որ դատավարության ընթացքում դատախազներից մեկը հայտարարեց, թե դա այն ժամանակվա դատախազի տեսակետն է եղել, որ այդ հոդվածը չպետք է կիրառվի, հիմա էլ մենք ենք այստեղ դատախազը եւ կարծում ենք, որ պետք է կիրառվի. «Այսինքն մեր դատախազությունը հաշվի չի առնում, որ դատախազությունը միասնական համակարգ է, նաեւ անձի ճակատագիրը չի կարող կախված լինել նրանից, թե տվյալ դեպքում դատախազներից որ մեկն է դատարանում մեղադրանքը ներկայացնում: Մենք անգամ վերաքննիչ դատարանին չկարողացանք սա բացատրել»:

Ալումյանը տեղեկացրեց, որ այդ 7 անձանց նկատմամբ քրեական հետապնդումը դադարեցնելու որոշման տակ ստորագրած 6 դատախազներից մեկն այսօր Վճռաբեկ դատարանի քրեական պալատի նախագահ Լիլիթ Թադեւոսյանն է:

Առայժմ պարզ չէ, թե արդյոք դատախազությունը պատրաստվում է վերանայել իր դիրոքորոշումը նաեւ 7-ի գործով եւ վճռաբեկ բողոք ներկայացնել դատավճիռները բեկանելու եւ նրանց, որոնց թվում է նաեւ Նիկոլ Փաշինյանը, եւս մեղադրանք առաջադրել 300.1 հոդվածով։

Աղբյուր` Փաստինֆո