Փաստ ինֆո

2019 թ. հունվարի 16-ին Հելսինկյան քաղաքացիական ասամբլեայի Վանաձորի գրասենյակը դիմել է Երևանի քաղաքապետ Հայկ Մարությանին՝ քաղաքապետարանի աշխատակազմի ճարտարապետության և քաղաքաշինության վարչության կողմից պատշաճ վարչարարության իրականացումն ապահովելու հարցով: Վարչությունը քաղաքացիների դիմումների հիման վրա շարունակ կայացնում է այնպիսի որոշումներ, որոնք հետագայում բողոքարկվում են վարչական դատարանում:

 
Եթե ուսումնասիրենք «Դատալեքս» դատական տեղեկատվական համակարգը, քաղաքացիների կողմից Երևանի քաղաքապետարանի դեմ բազմաթիվ հարուցված գործեր կգտնենք: Դրանցով հիմնականում վիճարկվում են Ճարտարապետության և քաղաքաշինության վարչության կայացրած որոշումները: Վարչության այդ աշխատելաոճը վերածվել է պարտադիր ընթացակարգի. քաղաքացիները ստիպված են լինում իրենց դիմումները ոչ պատշաճ վարչարարության արդյունքում մերժելու որոշումները վիճարկել դատարանում, ինչը Վարչական դատարանի ծանրաբեռնվածությանն է հանգեցնում:

Երևանի բնակիչներ Ա. Մարկոսյանն ու Զ. Սահակյանը այս նույն խնդրով դիմել են ՀՔԱ Վանաձորի գրասենյակ: Ա. Մարկոսյանը հայտնել է, որ Երևանի Դավիթաշեն թաղամասում գտնվող իր հողամասում շինարարություն սկսելու թույլտվություն ստանալու համար դիմել է Երևանի քաղաքապետարանի աշխատակազմի ճարտարապետության և քաղաքաշինության վարչություն և 2018թ. հուլիսի 17-ին մերժում է ստացել այն պատճառաբանությամբ, որ հողամասը գտնվում է Դավիթաշեն-Աշտարակ ճանապարհի շինարարական աշխատանքների իրականացման գոտուց 34մ հեռավորության վրա և կարող է հայտնվել ճանապարհաշինարարական աշխատանքների հնարավոր ազդեցության գոտում:

 
Բայց այդ նույն հեռավորության վրա գտնվող մեկ այլ հողամասում շինարարություն իրականացնելու թույլտվություն տրվել է: Ակնհայտ է, որ Վարչությունը ցուցաբերել է խտրական և անհավասար մոտեցում և խախտել է վարչարարության հիմնական սկզբունքներից մեկը՝ կամայականության արգելքի սկզբունքը:

Երևանի մեկ այլ բնակիչ Զ. Սահակյանը Երևանի քաղաքապետարան է դիմել իրեն սեփականության իրավունքով պատկանող հողամասի հարևանությամբ գտնվող տարածքի հարցով: Նա դիմել է Երևանի այդ ժամանակվա քաղաքապետ Տ. Մարգարյանին՝ այդ տարածքի նախորդ վարձակալի հետ կնքած պայմանագրի ժամկետն անցնելու հիմքով վարձակալության իրավունքը դադարեցնելու համար ՀՀ ԿԱ անշարժ գույքի կադաստրի պետական կոմիտե դիմելու հարցով:

2018թ. հուլիսի 13-ին Ճարտարապետության և քաղաքաշինության վարչության պետ Ա. Քասարյանը պատասխանել է, որ հարցի քննարկմանը հնարավոր կլինի անդրադառնալ նախորդ վարձակալի վարձակալության իրավունքը դադարեցնելուց և Կադաստրի պետական կոմիտեում վերագրացելուց հետո:

Մինչդեռ Երևանի քաղաքապետարանն ունի վարձակալության իրավունքն ուժը կորցրած ճանաչելու հարցով Կադաստրի պետական կոմիտե դիմելու իրավասությունը և կարող էր բավարարել քաղաքացու դիմումը: Կարող ենք արձանագրել, որ Երևանի քաղաքապետարանը դիմողների նկատմամբ իրականացրել է ոչ պատշաճ վարչարարություն, որի արդյունքում խախտվել են նրանց իրավունքներն ու ազատությունները: Ճարտարապետության և քաղաքաշինության վարչությունը ոչ պատշաճ վարչարարության արդյունքում մերժում է քաղաքացիների դիմումներն ու հայտնում, որ այդ որոշումները կարող են բողոքարկվել դատարանում: Նշենք, որ երկու դեպքում էլ քաղաքացիները դիմել են դատարան:

Ա. Մարկոսյանի հայցը դատարանը վարույթ չի ընդունել, Զ. Սահակյանի հայցը քննվում է Վարչական դատարանում: 2019թ. հունվարի 16-ի գրությամբ ՀՔԱ Վանաձորի գրասենյակը Երևանի քաղաքապետից պահանջել է վերանայել Ճարտարապետության և քաղաքաշինության վարչության կայացրած որոշումները, վերացնել քաղաքացիների իրավունքների խախտումներն ու միջոցներ ձեռնարկել պատշաճ վարչարարություն իրականացնելու համար: Քաղաքապետ Հ. Մարությանից դեռևս պատասխան չենք ստացել:

ՀՔԱ Վանաձորի գրասենյակ

Աղբյուր` Փաստինֆո