Փաստ ինֆո

ԱԱԾ տնօրեն, Հայաստանի Ֆուտբոլի ֆեդերացիայի նախագահ Արթուր Վանեցյանն այսօր այցելել է Հայրենիքի պաշտպանի վերականգնողական կենտրոն և հայտարարել, որ Ազգային անվտանգության ծառայությունն ու ՀՀ Ֆուտբոլի ֆեդերացիան պատրաստ են իրենց մոտ աշխատանքի ընդունել ծառայության ընթացքում վիրավորում ստացած զինծառայողներին։

«Կենտրոնում շրջելու ընթացքում այս հարցը խոսեցինք և մենք մեծ սիրով ԱԱԾ-ում ու Ֆուտբոլի ֆեդերացիայում աշխատանքի կընդունենք այստեղ բուժվող, բուժում ստացած տղաներին։ Ինձ ասացին, հնարավոր է, որ մենք մեր պահանջները ներկայացնենք, այսինքն, ինչ հմտություններ են պետք այդ մարդկանց մեզ մոտ աշխատելու համար և ուսումնական գործընթացն անցնելուց հետո իրենք կգան աշխատանքի», - վերականգնողական կենտրոնում լրագրողների հետ ճեպազրույցում ասաց Արթուր Վանեցյանը։

Նա նկատեց, որ վիրավորման հետևանքով շատ տղաներ չեն կարող իրենց աշխատանքը շարունակել Պաշտպանության նախարարությունում, փոխարենն իրենք կարող են աշխատել ԱԱԾ-ում:

«Կարծում եմ՝ սա իրենց համար շատ հետաքրքրի կլինի և ոգևորող։ Ես պարտավորվում եմ և խոստանում եմ առաջիկայում և մշտապես այդ պրոցեսը պահել հսկողության տակ ու ինչքան հնարավոր է ներգրավվենք մեր տղաներին, մեր հերոսներին այդ աշխատանքներում», - ասաց Վանեցյանը։

Երևանի պետական բժշկական համալսարանի ռեկտոր Արմեն Մուրադյանի հետ զրույցում նա տեղեկացրել է, որ ֆուտբոլի ասպարեզում շատ հայտնի մարդիկ են այցելելու Հայաստան՝ պատրաստակամություն հայտնելով հրավիրել նաեւ վիրավորված զինվորներին։

«Հյուրեր ենք ունենալու, ֆուտբոլի ասպարեզում շատ հայտնի մարդկանց, եթե տղաներն, իհարկե, կուզեն, մեծ սիրով, իրենց կհրավիրենք», - ասաց Ա.Վանեցյանը:

Արմեն Մուրադյանն էլ նշեց, որ մեծ ցանկություն կա: «Ֆուտբոլի խաղերին գալիս են ու շատ տպավորիչ է, որ անգամ սայլակով, օրհներգի ժամանակ փորձում են կանգնել», - նշեց նա:

Աղբյուր` Փաստինֆո