Փաստ ինֆո

Վերաքննիչ քրեական դատարանում ՝դատավոր Ռուզաննա Բարսեղյանի նախագահությամբ, այսօր չավարտվեց Արմեն Գեւորգյանի գործով դատախազության եւ պաշտպանական կողմի բողոքների քննությունը։ 

Մի քանի ժամ տեւած դատական նիստի ընթացքում հայտարարությամբ է եկել նախկին փոխվարչապետ Արմեն Գեւորգյանը։ Նիստից հետո լրագրողների հետ զրույցում նա հայտնեց, որ դատարանին ներկայացրել է բոլոր հանգամանքները, որոնք վկայում են առաջադրված մեղադրանքների անհիմն լինելու մասին։ « Խնդրեցի, որպեսզի իմ բոլոր գործընկերները՝ ե՛ւ դատախազությունում, ե՛ւ Քննչական մարմիններում, ամեն ինչ անենք, որպեսզի գործը անաչառության օբյեկտիվության եւ հանգիստ մթնոլորտում քննվի, որպեսզի վերջիվերջո արդարությունը ի հայտ գա եւ բոլորս իմանանք՝ ինչ էր եղել եւ ինձանից ինչ էին ուզում»,- ասաց ՀՀ նախկին փոխվարչապետը:

Հարցին՝ Ռոբերտ Քոչարյանից ինչ-որ հրաման ստացե՞լ եք Մարտի 1-ի գործի հետ կապված, Գեւորգյանը նշեց, որ գործի հետի կապված նյուանսներ չի կարող մատնանշել։ «Սիրելի բարեկամներ, մեկ անգամ եւս ուզում եմ ձեզ հիշեցնել, ես այսօր գտնվում եմ այնպիսի կարգավիճակում, որ չեմ կարող ձեզ որեւէ տեղեկություն տալ գործի հետ կապված նյութերից, ես հասկանում եմ, որ համբերության խնդիր կա, ժամանակի խնդիր կա, նորությունները տարածելու, լուրերը տարծելու խնդիր կա, բայց խնդրում եմ համբերություն: Ես գործի հետ կապված նյուանսներ չեմ կարող մատնանշել»,- հայտարարեց Արմեն Գեւորգյանը:

Անդրադառնալով արդարադատությանը խոչընդոտելու՝ ՍԴ այն ժամանակվա դատավոր Վալերի Պողոսյանի վրա ճնշում գործադրելու հարցին՝ Գեւորգյանը նշեց. «Մի հատ ինձ նայեք, ես ճնշում գործադրող մարդ կարո՞ղ եմ լինել»:

Հարցին՝ իրեն առաջադրված մեղադրանքերում Գեւորգյանը քաղաքական հետապնդման տարրեր տեսնո՞ւմ է՝ Գեւորգյանը հայտարարեց, որ դատախազությունում խոստացել է մաքսիմալ փորձել ձեռնպահ մնալ հանրայնորեն գնահատական տալ գործի ընթացքի մասին: «Ես գուցե տարօրինակ մարդ եմ, բայց քանի որ հայտնվել եմ այս վիճակում, փորձում եմ, որպեսզի ամբողջը իրականանա օրինական, իրավական դաշտում»,- ասաց նախկին փոխվարչապետը:

Նշենք, որ արդարադատության իրականացմանը խոչընդոտելու համար Գեւորգյանին առաջադրված մեղադրանքի վաղեմության ժամկետն անցել է, սակայն նա չի համաձայնել, որ վաղեմության հիմքով քրեական հետապնդումը դադարեցվի։ Նա ցանկանում է արդարացվել եւ վերականգնել իր պատիվը, հեղինակությունը։ Պատասխանելով լրագրողի հարցին՝ թե արդյոք նա վստահո՞ւմ է իրավապահ համակարգին՝ Գեւորգյանը նշել է, որ վստահում է իրեն, իր պաշտպաններին եւ օրենսդրությանը։

Հաջորդ դատական նիստը տեղի կունենա հունվարի 25-ին։

Աղբյուր` Փաստինֆո