Փաստ ինֆո

7-րդ գումարման Ազգային ժողովի անդրանիկ նիստում միջադեպ գրանցվեց Սասուն Միքայելյանի եւ Էդմոնդ Մարւքյանի միջև՝ ԱԺ 3-րդ փոխնախագահի ընտրության հարցի քննարկման ժամանակ:

Հիշեցնենք, որ երրորդ փոխնախագահի պաշտոնին հավակնում է թե Լուսավոր Հայաստանը, թե ԲՀԿ-ն։ Իշխող քաղաքական ուժը հայտարարել է ԲՀԿ-ի թեկնածուին սատարելու մասին։

«Մենք չենք վիճարկում, որ ԲՀԿ-ն Ազգային ժողովի երկրորդ քաղաքական ուժն է: Դա փաստ է: Մենք վիճարկում ենք այն, թե արդյոք ԱԺ 3-րդ փոխնախագահը պետք է լինի՞ ԲՀԿ-ից, թե՞ ԼՀԿ-ից: Մենք ասում ենք՝ մենք ենք այդ տեղի հավակնորդը, որովհետև մեր փոխխոսնակը որպես ընդդիմադիր, կլինի ավելի լավը: Որևէ անձնական բան չկա, մենք ձեր հետ կռիվ չունենք, որովհետև դուք չեք որոշելու, լինի՞ տիկին Թանդիլյանը փոխնախագահ, թե՞ ոչ: Մեր կռիվը իրանց հետ է, իրանք պետք է պատասխան տան»,- ասաց Մարուքյանն՝ ակնարկելով խորհրդարանական մեծամասնությանը:

Մարուքյանի «իրանք» արտահայտությունը, այսինքն՝ դիմելաձևը քաղաքական մեծամասնությանը, մասնավորապես Սասուն Միքայելյանին դուր չեկավ, և պատգամավորը տեղից որոշ ռեպլիկներ արեց, սակայն քանի որ նա բարձրախոսով չէր, լսելի չէր՝ ինչ ասաց:

«Բան ունե՞ք ասելու, պարո՛ն Միքայելյան»,- Էդմոն Մարուքյանը հետաքրքրվեց տեղում անհնագիստ նստած Սասուն Միքայելյանից:

Վերջինին հետաքրքրում էր, թե ու՞մ նկատի ունի «իրանք» ասելով: Մարուքյանն ի պատասխան ասաց՝ «քաղաքական մեծամասնությանը»:

«Պարո՛ն Միքայելյան, եթե ուզում եք, գրանցվեք, ելույթ ունեցեք, խնդրում եմ, տեղից մյուս անգամ իմ ելույթի ժամանակ չմիջամտեք, եղա՞վ: Դուք բանախոսի հետ բանավեճի մեջ եք մտել, ինձ լավ ճանաչում եք, ես էլ ձեզ»,- արձագանքեց Մարուքյանը:

Նշենք, որ ԱԺ 3-րդ փոխնախագահի պաշտոնում ԲՀԿ-ն առաջադրել է Վահե Էնֆիաջյանի, իսկ ԼՀԿ-ն՝ Մանե Թանդիլյանի թեկնածությունը:

Աղբյուր` Փաստինֆո