Փաստ ինֆո

Կառավարության այսօրվա նիստում վարչապետի պաշտոնակատար Նիկոլ Փաշինյանը անդրադարձավ կառավարության կառուցվածքային փոփոխությունների հարցին՝ նշելով, որ դրա նպատակը ոչ թե գումար տնտեսելն է, այլ կառավարման արդյունավետության բարձրացումը:

«ԱԺ ընտրությունների նախընտրական քարոզարշավին խոստում ենք տվել, որ կազմը պետք փոխվի և նախարարությունների թիվը կրճատվի: Այս պրոցեսի իմաստը և նպատակը ամենևին էլ փող խնայելը չէ, նպատակը բարձրացնելն է կառավարության և պետական կառավարման մարմինների արդյունավետությունը», - կառավարության նիստում հայտարարեց Նիկոլ Փաշինյանը՝ նշելով, որ այդ ուղղությամբ շատ լուրջ աշխատանք է սպասվում:

Նշելով, որ քննարկումներն այդ ուղղությամբ շարունակվելու են վարչապետի պաշտոնակատարը նշել է. «Իհարկե, մենք համոզված ենք, որ պետք է շարժվել այս ճանապարհով և, ըստ էության, ՀՀ քաղաքացիներից ստացել ենք այդ մանդատը: Մենք կլսենք բոլոր տեսակետները, կկայացնենք առավել բալանսավորված որոշում»:

Վարչապետի պաշտոնակատարն հատուկ անդրադարձավ Սփյուռքի նախարարարության լուծարմանը եւ նշեց, որ թյուր տպավորություն կա, թե ուզում են «խաչ քաշել» Սփյուռքի նախարարության վրա։

«Ընդհակառակը, խնդիրը սփյուռքի հետ կառավարության հարաբերությունները առավել արդյունավետ դարձնելն է։ Այս առումով մենք որոշակի մոդել և առաջարկ ունենք, որը ենթադրում է, որ Սփյուռքի հետ հարաբերությունների մակարդակը ոչ թե կնվազեցվի, այլ կբարձրացվի և այդ մոդելի վերաբերյալ քննարկումներ կունենանք սփյուռքի ներկայացուցիչների հետ և կհասնենք կոնսեսուսի», - ասաց նա:

Նա հայտարարել է, որ առաջ են գնալու հետևողական, հաստատուն և մտածված քայլերով և համոզմունք հայտնել, որ այդպիսով արձանագրած լուծումները կապացուցեն իրենց կենսունակությունը ու կգոհացնեն այն մարդկանց, ովքեր մտահոգված են պետական կառավարման արդյունավետության բարձրացման խնդիրներով։

Աղբյուր` Փաստինֆո