Փաստ ինֆո

ՀՀ 7-րդ գումարման Ազգային ժողովի նորընտիր պատգամավորները ստացան իրենց մանդատները: Մանդատներն առաջին անգամ հանձնեց ոչ թե Կենտրոնական ընտրական հանձնաժողովի նախագահը, այլ՝ համակարգչային վիճակահանությամբ ընտրված 28 ընտրողներ: «Արմենպրես»-ի հաղորդմամբ՝ հանդիսավոր արարողությունը կայացավ հունվարի 10-ին Ա. Սպենդիարյանի անվան օպերայի և բալետի ազգային ակադեմիական թատրոնի շենքում:

«Ընտրություններին մասնակցած քաղաքացիների միջև տեղի ունեցած վիճակահանության արդյունքներով ընտրվել են 28 քաղաքացիներ, ովքեր ընտրողների անունից մանդատները կտրամադրեն նորընտիր խորհրդարանի պատգամավորներին: Ընտրվածների թվում են նաև ամենաերիտասարդ ընտրողներ, ում 18 տարեկանը լրացել է ընտրության օրը: Հրավիրել ենք նաև քվեարկության ամենատարեց մասնակիցներ 103 տարեկան Բավական Փիլոյանին՝ Լոռու մարզից և 99 տարեկան Խաչիկ Գաբրիելյանին՝ Արարատի մարզից»,-ներկայացրեց ԿԸՀ նախագահ Տիգրան Մուկուչյանը:

Իրականացված մեկ այլ վիճակահանությամբ որոշվել էր քաղաքացիների կողմից մանդատների տրամադրման հաջորդականությունը: Մուկուչյանը նշեց, որ նման խորհրդանշական եղանակով մանդատների հանձնմամբ ցանկացել են լրացուցիչ անգամ ընդգծել ՀՀ սահմանադրությամբ ամրագրված ուղղակի ընտրական իրավունքի ինստիտուտի բովանդակությունը: ԿԸՀ նախագահը նորընտիր պատգամավորներին բեղմնավոր գործունեություն մաղթեց օրենսդիր մարմնում:

103 տարեկան Բավական Փիլոյանն առաջին մանդատը հանձնեց «Լուսավոր Հայաստան» կուսակցության պատգամավոր Գուրգեն Բաղդասարյանին: Բավական տատը նաև իր մաղթանքը փոխանցեց նորընտիր պատգամավորին:

«Բարգավաճ Հայաստան» կուսակցության արդեն փորձ ունեցող պատգամավոր Գևորգ Պետրոսյանն   «Արմենպրես»-ի հետ զրույցում նշեց, որ փորձ չունեցող պատգամավորների հետ աշխատելու են շատ սերտ: «Ես մտադիր եմ նրանց ուղղություն տալ, նպաստել ԱԺ-ում նրանց ինքնահաստատմանը: Նրանք, ովքեր կցանկանան աշխատել, ես չեմ զլանա իմ փորձը կիսել նրանց հետ»,-նշեց Պետրոսյանը:

Մյուս խմբակցությունների արդեն փորձառու պատգամավորները ևս իրենց պատրաստակամությունը հայտնեցին առավելագույնս աջակցելու նոր պատգամավորներին:

Մանդատների հանձնման արարողությունը կազմակերպել էր ՀՀ ԿԸՀ-ը՝  միջազգային գործընկերների համագործակցությամբ «Հայաստանում ընտրական գործընթացների աջակցություն ծրագրի» շրջանակում:

Ազգային ժողովի դեկտեմբերի 9-ին կայացած արտահերթ ընտրությունների արդյունքում «Իմ քայլը» դաշինքը ստացավ պատգամավորական 88 մանդատ, «Բարգավաճ Հայաստան» կուսակցությունը՝ 26, իսկ «Լուսավոր Հայաստան» կուսակցությունը՝ 18 մանդատ։ «Իմ քայլի» չորս մանդատը ստանալու են Հայաստանի եզդի, ռուս, ասորի և քուրդ ազգային փոքրամասնությունների 1-ական ներկայացուցիչ։ 7-րդ գումարման ԱԺ առաջին նիստը կայանալու է հունվարի 14-ին:

Աղբյուր` Փաստինֆո