Փաստ ինֆո

Փաստաբան Ալեքսանդր Սիրունյանը պահանջում է, որ նախաքննական մարմինն իրենից ներողություն խնդրի։

Նա համապատասխան դիմում է հղել ՀՀ վարչապետի պաշտոնակատար Նիկոլ Փաշինյանին եւ գլխավոր դատախազ Արթուր Դավթյանին։

Դիմումում, մասնավորապես, ասվում է. « Քննչական կոմիտեի Երևան քաղաքի քննչական վարչության Կենտրոն և Նորք-Մարաշ վարչական շրջանների քննչական բաժնում հանցակազմի բացակայության հիմքով կարճվել է իմ նկատմամբ ապօրինի հարուցված, ապօրինի քննված, իմ ազատ տեղաշարժի և գույքային իրավունքների ապօրինի սահմանափակումներով զուգորդված թիվ 131 56718 քրեական գործը։

Քրեական դատավարության օրենսգրքի 66-րդ հոդվածի տասներորդ մասի համաձայն՝ քրեական հետապնդման մարմինը պարտավոր է գրավոր ներողություն հայցել արդարացվածից։
Այդ կապակցությամբ, հարգելի պարոն գլխավոր դատախազ, խնդրում եմ ապահովել քրեական հետապնդման մարմնի հիշյալ պարտականության կատարումը եւ իմ համապատասխան իրավունքի իրագործումը։

Նույն օրենսգրքի 66 հոդվածի 4-րդ 4-րդ կետի համաձայն՝ արդարացվածը որպես հատուցում իրավունք ունի ստանալ փաստաբանին վճարված գումարները։

Միաժամանակ քաղաքացիական օրենսգրքի 1064 հոդվածի առաջին մասի համաձայն՝ ապօրինի դատապարտելու, քրեական պատասխանատվության ենթարկելու, որպես խափանման միջոց կալանք կամ չբացակայելու մասին ստորագրություն կիրառելու, վարչաւան տույժի ենթարկելու հետեւանքով պետությանը պատճառված վնասը, օրենքով սահմանված կարգով, լրիվ ծավալով հատուցում է Հայաստանի Հանրապետությունը՝ անկախ հետաքննության, նախաքննության, դատախազության եւ դատարանի պաշտոնատար անձանց մեղքից։

Այդ կապակցությամբ, հարգելի պարոն Վարչապետ, դատական հնարավոր ընթացակարգերից խուսափելու նպատակով, խնդրում եմ, քննարկել ինձ դրամական փոխհատուցում տրամադրելու հարցը։

Քրեական օրենսգրքի 336 հոդվածի համաձայն՝ անձին քրեական պատասխանատվության ենթարկելը չհաստատված հանցագործության դեպքով կամ առանց դեպքին անձի մասնակցությունը հիմնավորող կամ ոչ բավարար չափով հիմնավորող կամ առանց նրա արարքում հանցակազմը հավաստող փաստական տվյալների առկայության, պատժելի է, իսկ սույն գործով ես ակնհայտորեն տեսնում եմ Երևան քաղաքի Կենտրոն և Նորք –Մարաշ վարչական շրջանների դատախազության միտումնավոր գործելակերպը, որն, ընդ որում, լուրջ վնաս է պատճառել փաստաբան, Հայաստանի Հանրապետության հպարտ քաղաքացու, իրավաբանական գիտությունների թեկնածու, դոցենտ, արդարադատության առաջին դասի խորհրդական Ա.Սիրունյանիս պատվին և արժանապատվությանը, ինչպես նաեւ «Սիրունյան-Կիրակոսյան» իրավաբանական գրասենյակի բարի համբավին։

Այդ կապակցությամբ, հարգելի պարոն գլխավոր դատախազ, խնդրում եմ հանձնարարել հետաքննության կամ նախաքննության համապատասխան մարմնին ինձանից ընդունել հաղորդում հանցագործության մասին»։

Աղբյուր` Փաստինֆո