Փաստ ինֆո

Ղազախստանի Կարագանդա քաղաքում մահվան ելքով բախման միջադեպը ազգամիջյան բախման կոնտեքստ չի կարող ունենալ, նախօրեին լրագրողների հետ ճեպազրույցում հայտարարել է ՀՀ վարչապետի պաշտոնակատար Նիկոլ Փաշինյանը՝ ցավակցելով զոհվածի հարազատներին:

«Ուզում եմ ընդգծել, որ այդտեղ չի կարող լինել ազգամիջյան որևէ կոնտեքստ, որովհետև որքան ինձ են զեկուցել, կոնֆլիկտ ունեցած երկու խմբերն ազգային առումով միատարր չեն եղել, և դանակահարող խմբի մեջ ազգությամբ ղազախ քաղաքացի է եղել»,- ասել է նա:

Վարչապետի պաշտոնակատարը լրագրողներին կոչ է արել շրջանառության մեջ դրված վարկածներն ու լուրերը հրապարակել ստուիգելուց հետո:

Հունվարի 1-ին, հիշեցնենք, Կարագանդայի «Հին Հռոմ» ռեստորանի մոտ հայերի մասնակցությամբ տեղի էր ունեցել զանգվածային ծեծկռտուք, որի հետևանքով Ղազախստանի մի բնակիչ մահացել էր: Տոնական օրերին բողոքի ակցիաներ էին անցկացվում՝ իշխանություններից պահանջելով վտարել հայերին Ղազախստանից: Տարբեր աղբյուրների համաձայն, 23 քաղաքացի արդեն իսկ վտարվել է Ղազախստանից:

Ղազախական «БАСЕ» հեռուստաընկերությունը ռեպորտաժ էր պատրաստել, որի համաձայն, սպանությունից հետո հարուցված քրեական գործում շոշափվել է ադրբեջանցի երկու քաղաքացիների անուններ, սակայն ավելի ուշ դրանք փոխարինվել են հայկական անուն-ազգանուններով: Տարբեր փորձագետների պնդմամբ, բողոքի ակցիաները, ինչպես նաև սոցիալական ցանցերում հայերի նկատմամբ ատելության քարոզը հրահրվել են ադրբեջանցիների կողմից:
 

Աղբյուր` Փաստինֆո