Փաստ ինֆո

Նախորդ օրը «Գյումրու Մոր ու մանկան ավստրիական մանկական հիվանդանոցում» 5 ամսական աղջիկ երեխայի մահվան դեպք է գրանցվել։

Շիրակի մարզի դատախազ Կարեն Գաբրիելյանն Aravot.am-ին հայտնել է, որ երեկ ծնողի՝ Սարգիս Միքայելյանի կողմից հաղորդում է տրվել երեխայի մահվան կապակցությամբ, որով նա իր մտահոգություններն է հայտնել բժշկական անձնակազմի կողմից ենթադրյալ բացթողումներ կատարելու վերաբերյալ։

«Նշված հաղորդումը ՀՀ Քրեական դատավարության 180-181 հոդվածների սահմանած կարգով նյութեր նախապատրաստելու հանձնարարությամբ ուղարկվել է Շիրակի մարզի քննչական վարչություն։ Նշանակվել է դիակի դատաբժշկական փորձաքննություն՝ մահվան հանգամանքները պարզելու ուղղությամբ։

Օրենքով նախատեսված նյութերի նախապատրաստման թույլատրելի ժամկետը լրանալուց հետո կկայանա քրեական գործ հարուցելու կամ մերժելու մասին որոշում»,-ասել է դատախազը։

Շիրակի մարզպետարանի առողջապահության և սոցիալական ապահովության վարչության պետ ժ/պ Հասմիկ Պետրոսյանն էլ ասաց․ «Տեղյակ եմ, բայց որևէ մեկնաբանություն չեմ տա, քանի որ նշանակված է դատաբժշկական փորձաքննություն»։

Մեր տեղեկություններով, հունվարի 4-ին երեխայի ծնողները դիմել են վերոհիշյալ հիվանդանոց, երեխան ստացել է առաջին բուժօգնությունը, նրան ուղարկել են տուն, նորից վատացած բերել են հիվանդանոց, որտեղ էլ գրանցվել է երեխայի մահը։

Աղբյուր` Փաստինֆո