Փաստ ինֆո

Բարձրագույն դատական խորհրդի դեմ նոր հայցեր են ներկայացվել դատարան։ «Փաստինֆո»-ի տեղեկություններով՝ ԲԴԽ-ի դեմ վարչական դատարան է դիմել ՀՀ գլխավոր դատախազության կոռուպցիայի եւ կազմակերպված հանցավորության դեմ պայքարի վարչության նախկին պետ Արմեն Աշրաֆյանի դուստրը՝ Նելլի Աշրաֆյանը՝ պահանջելով պարտավորեցնել ԲԴԽ-ին՝ իրեն դատավորների թեկնածուների ցուցակում ընգրկվելու վերաբերյալ վարչական ակտ ընդունելուն։ Նշենք, որ Ն.Աշրաֆյանը երկար տարիների դատախազական աշխատանքի փորձ ունի։

Նա տարիներ առաջ մեկ անգամ արդեն ընդգրկվել էր դատավորների թեկնածուների ցուցակում, սակայն Արդարադատության խորհրդի որոշմամբ հանվել էր ցուցակից այն բանից հետո, երբ հանել է Նելլի Աշրաֆյանը չի համաձայնել Լոռու, Շիրակի կամ Սյունիքի մարզերից որեւէ մեկի դատարանի դատավոր դառնալ եւ ցանկացել է նշանակվել Երեւանի դատարաններից որեւէ մեկում: Արդյունքում, Արդարադատության խորհուրդը նրա անունը հանել է դատավորների ցուցակից` կիրառելով ՀՀ դատական օրենսգրքի պահանջները, ըստ որոնց` եթե դատավորի թեկնածուն հրաժարվում է ստանձնել իրեն առաջարկված դատավորի պաշտոնը, ապա նրա անունը դատավորի թեկնածուների ցուցակից հանվում է:

Հայցադիմումը վարչական դատարան մուտք է եղել 2018 թվականի դեկտեմբերի 28-ին։ Դրանից մեկ օր առաջ նույն դատարան է դիմել եւս երկու հոգի՝ Արմեն Պողոսյանը եւ Հայկ Իսրայելյանը։ Նրանք եւս պահանջում են իրենց ընդգրկել դատավորների թեկնածուների ցուցակում։

Մասնավորապես՝ հայցադիմումով նրանք դատարանից պահանջում Դատավորների թեկնածուների ցուցակի քրեական բաժնի համալրման նպատակով 31.10.2018թ անցկացված որակավորման գրավոր քննության քրեական մասնագիտացման աշխատանքների 03.11.2018թ հրապարակված արդյունքները մասնակի՝ Արմեն Ալեքսանդրի Պողոսյանին և Հայկ Սերժիկի Իսրայելյանին վերաբերվող մասով, անվավեր ճանաչել և պարտավորեցնել ՀՀ բարձրագույն դատական խորհրդին Արմեն Ալեքսանդրի Պողոսյանին և Հայկ Սերժիկի Իսրայելյանին դատավորների թեկնածուների քրեական մասնագիտացման բաժնի հավակնորդների ցուցակում ընդգրկելուն։

Ըստ հրապարակված պաշտոնական տվյալների՝ գրավոր քննության արդյունքում Արմեն Պողոսյանն ստացել է 20,5, իսկ Հայկ Իսրայելյանը՝ 16 միավոր։

Աղբյուր` Փաստինֆո