Փաստ ինֆո

Երևանի ընդհանուր իրավասության դատարանը ճանաչել և հռչակել է ՀՀ քննչական կոմիտեի Երևան քաղաքի քննչական վարչության Արաբկիր վարչական շրջանի քննչական բաժնի ավագ քննիչ Նարեկ Հովհաննիսյանի անմեղությունը՝ պաշտոնեական անփութության համար առաջադրված մեղադրանքում եւ արդարացրել նրան։

«Փաստինֆո»-ի հաղորդմամբ՝ քննիչ Հովհաննիսյանն է սկզբնական փուլում քննել քրեական աշխարհում հեղինակություն համարվող Ջնդի Ամարյանի վերաբերյալ քրեական գործը, ով մեղադրվում էր իրեն պատկանող «Արևելյան խոհանոց» ռեստորանում օրենքով գող Վիտալի Ավդիանիի և մի խումբ այլ անձանց հետ նախնական համաձայնությամբ, բռնություն գործադրմամբ ու սպառնալիքներով քաղաքացուց 20 հազար դոլար շորթելու մեջ։ Նրա նկատմամբ քրեական հետապնդումը դադարեցվեց, ինչից հետո մեղադրյալի կարգավիճակում հայտնվեց տուժա քաղաքացու հաղորդման հիման վրա հարուցված քրեական գործը վարույթ ընդունած քննիչը։ Քրեական հեղինակությունը հայտարարել էր, թե քրեական գործից անհետացել է իր մատանին։

Հատուկ քննչական ծառայությունը հարուցեց քրեական գործ եւ քննիչին մեղադրանք առաջադրեց անփութության համար, իսկ քրեական գործն էլ ուղարկեց դատարան։

Քրեական գործը քննվել է Երեւանի ընդհանուր իրավասության դատարանի՝ Արաբկիր վարչական շրջանի նստավայրում, որտեղ գործը մուտք եղել դեռեւս 2017 թվականի ապրիլին։ Դատավոր Դավիթ Գրիգորյանի նախագահությամբ տեւած երկարատեւ դատավարության արդյունքում դատարանը ապացուցված չի համարել քրեական հեղինակության մատանու կորելու համար քննիչին առաջադրված մեղադրանքը։

Դատարանն արձանագրվել է, որ վկաների եւ ընթերականների ցուցմունքների համաձայն՝ Ջնդի Ամարյանին պատկանող ժամացույցն ու ոսկյա մատանին Ա4 ձևաչափի թղթից` երկտակ հավասարաչափ ծալելու և երեք կողմերը մետաղական կարիչով կարելու եղանակով փաթեթավորմանը քննիչ Հովհաննիսյանը որևէ մասնակցություն չի ունեցել, որպիսի պայմաններում հնարավոր չէ ապացուցված համարել, որ Նարեկ Հովհաննիսյանին մեղսագրված արարքը տեղի է ունեցել։

Դատարանի գնահատմամբ քննիչի արարքում բացակայում է հանցակազմը, ուստի ճանաչել և հռչակել է նրա անմեղությունը ՀՀ քրեական օրենսգրքի 315-րդ հոդվածի 1-ին մասով

Աղբյուր` Փաստինֆո