Փաստ ինֆո

Այսօր վաղ առավոտից Էջմիածնում վերսկսվել են Մանվել Գրիգորյանին գրավի դիմաց ազատ արձակելու որոշման դեմ բողոքի ակցիաները։ Ցուցարարները պահանջում են վերստին կալանավորել նրան։

Հիշեցնենք, որ Երևանի ընդհանուր իրավասության դատարանը դեկտեմբերի 21-ին նրա նկատմամբ կիրառել է կալանավորման այլընտրանքային խափանման միջոցը՝ գրավ՝ որպես գրավի չափ սահմանելով 25 մլն դրամ։

Կեսգիշերի մոտ նա ազատ արձակվեց «Երևան–Կենտրոն» ՔԿՀ-ից: Լրագրողների հարցին, թե ինչպես է իրեն զգում՝ Մ.Գրիգորյանը պատասխանեց կարճ. «Շատ լավ»: Այլ հարցերի նա չպատասխանեց, նստեց մեքենան և հեռացավ:

Դատարանի որոշումն առաջացրել է  Էջմիածնի բնակիչների վրդովմունքը եւ արդեն երկրորդ օրն է, ինչ Էջմիածնում տեղի են ունենում բողոքի ակցիաներ։ Երեկ ցուցարարները փակել էին նաեւ Էջմիածին-Երեւան միջպետական ճանապարհը եւ միայն բանակցություններից հետո՝ 16։30-ի սահմաններում բացել այն։ 

Գլխավոր դատախազությունը հայտարարել է, որ դատարանի որոշման դեմ վերաքննիչ բողոք կներկայացնի,իսկ վարչապետի պաշտոնակատար Նիկոլ Փաշինյանը նշել է, որ դատարանի որոշումն իր համար անակնկալ է եղել, բայցեւ նշել, որ ուրախ կլինի, եթե պարզվի, որ  որոշումը դատարանի արդարության արդյունքում է կայացվել. «Եթե պարզվի, որ սա ինչ-որ ապօրինի ազդեցության արդյունք է, ես բնականաբար շատ կտխրեմ: Եթե պարզվի, որ սա դատարանի անկախության արտահայտությունն է, ես շատ կուրախանամ,- ասել է Փաշինյանը՝ հավելելով.

«Պետությունը, մենք, կառավարությունը, այսպես ասած, ճնշումներ չի գործադրում դատական համակարգի վրա, բայց ես համոզված չեմ, որ ինչ-որ հին մեխանիզմներ, հին կապեր եւ այլն չեն գործում: Որովհետեւ դատական համակարգի ծագումնաբանությունը բոլորս գիտենք: Բայց ես նաեւ չեմ ուզում որեւէ դատավորի անմեղության կանխավարկածը խախտեմ: Որովհետեւ, եթե մենք ուզում ենք դատական համակարգը անկախ լինի, նաեւ պետք է ընդունենք, որ միշտ չէ, որ քննչական մարմնի, մեղադրող կողմի եւ դատարանի կարծիքները կհամընկնեն»:

Ավելի վաղ տեղեկացրել ենք, որ Գրիգորյանին մեղադրանք է առաջադրվել առաջադրվել Քրեական օրենսգրքի 235-րդ հոդվածի 2-րդ մասով՝ ապօրինի կերպով ռազմամթերք ձեռք բերելու և այլ անձանց հետ նախնական համաձայնությամբ պահելու համար, ինչպես նաև քրեական օրենսգրքի 179-րդ հոդվածի 3-րդ մասի 1-ին կետով՝ ապօրինի կերպով ռազմամթերք ձեռք բերելու եւ կնոջ` Նազիկ Ամիրյանի, դստեր` Այծեմնիկ Գրիգորյանի, Էջմիածին քաղաքի բնակիչներ Սեյրան Ազարյանի, Արմեն Հակոբյանի եւ այլ անձանց հետ նախնական համաձայնությամբ իրեն պատկանող առանձնատներում պահելու համար, ինչպես նաեւ՝ մի խումբ անձանց հետ նախնական համաձայնությամբ ապրիլյան պատերազմի օրերին ուղարկված օգնությունը յուրացման եղանակով հափշտակելու համար:

Մանվել Գրիգորյանը ձերբակալվել է հունիսի 16-ին, ապա՝ հունիսի 19-ին Ազգային ժողովի պատգամավորների քվեարկությամբ, զրկվել պատգամավորական անձեռնմխելիությունից ու դատարանի որոշմամբ կալանավորվել ու կալանքի տակ է մնացել մինչեւ դեկտեմբերի 21-ը։

Նկատենք, որ Մանվել Գրիգորյանը դիմել էր կառավարությանը՝ ցանկություն հայտնելով պետությանը նվիրել Ակնալիճ համայնքում գտնվող «Ակնալճի կուղբաբուծական տնտեսություն» ընկերության 329 հեկտար տարածքը: Փաստաբանը սակայն հայտարարել էր, որ Գրիգորյանի կողմից դա աջակցություն է պետությանը և ոչ թե մեղքերի թողություն:

Գրիգորյանի պաշտպանական խումբը նաև պնդում էր, որ նա ունի առողջական լուրջ խնդիրներ:

Ուղիղ հեռարձակումը՝ 1in.am-ի։

Աղբյուր` Փաստինֆո