Փաստ ինֆո

Դեռեւս Ազգային ժողովի պատգամավորի կարգավիճակ ունեցող Մանվել Գրիգորյանին գրավի դիմաց ազատ արձակելու որոշման դեմ բողոքող Էջմիածնի բնակիչները փակել են Երևան-Էջմիածին միջպետական ճանապարհը: Մեկ այլ խումբ էլ բողոքի ակցիա է իրականացնում հենց Էջմիածնում։ Նրանք պահանջում են կրկին կալանավորել Մանվել Գրիգորյանին, ինչպես նաև զրկել նրան գեներալի կոչումից: 

Միջպետական ճանապարհը փակած ակցիայի մասնակիցների մոտ է գնացել՝ փորձում է հասկանալ, թե ո՞վ է համակարգում բողոքի ակցիաները, քանի որ զուգահեռ ակցիաներ են իրականացվում նաև Էջմիածնում: Բողոքի ակցիայի մասնակիցները նշել են, որ հավաքներն ինքնաբուխ են: Քաղաքապետը հավատացրել է, որ հասկանում է քաղաքացիների բողոքը, սակայն կոչ արեց նախատոնական օրերին չպարալիզացնել ճանապարհները, որպեսզի քաղաքացիները կարողանան իրենց առևտուրը պատշաճ իրականացնել:

Բողոքի ակցիայի մասնակիցները նշեցին, որ չեն պատրաստվում ամբողջ օրը պարալիզացնել քաղաքի երթևեկությունը, սակայն չեն կարող հանդուրժել այն հանգամանքը, որ Մանվել Գրիգորյանն ազատ է արձակվել:

Էջմիածնի քաղաքապետն ընդգծեց, որ ինքը օրվա ընթացքում շրջելու է քաղաքում, լինելու է այն խաչմերուկներում, որոնք փակ են: 

Ակիցիայի մասնակիցներին է միացել նաև Ազգային ժողովի նախկին պատգամավոր Հակոբ Հակոբյանը։

«Ժողովուրդը դեմ է, որպեսզի էդպիսի մարդ ապրի իրենց կողքին։ Ստեղ որևէ մեկը որևէ մեկից չի վախենում։ Էջմիածնեցին վախկոտ մարդ չի։ Հիմա ավելի լավ ա Մանվելը մի հատ բահ վերցնի, փորի, ինքը թաղվի, ավելի շուտ կներվի, եթե ինքը ինքնասպանություն գործի։ Թող ինքնահրկիզվի», - հայտարարեց Հակոբ Հակոբյանը։

Ի դեպ, Էջմիածնի քաղաքապետ Դիանա Գասպարյանի տեղեկություններով՝ Մանվել Գրիգորյանը ներկայումս ոչ թե Էջմիածնում է, այլ՝ Ակնալճի ամառանոցում։

Աղբյուր` Փաստինֆո