Փաստ ինֆո

ՀՀ երկրորդ նախագահ Ռոբերտ Քոչարյանն ընդդեմ «Սկիզբ Մեդիա Կենտրոն» ՍՊ ընկերության՝ զրպարտություն համարվող փաստացի տվյալները հրապարակայնորեն հերքելու և զրպարտության դիմաց փոխհատուցում ստանալու պահանջների մասին գործով դատաքննության ավարատ է հայտարարվել:

Իսկ մինչ այդ Երևան քաղաքի ընդհանուր իրավասության դատարանը՝ նախագահությամբ դատավոր Սարգիս Երիցյանի, մերժել է պատասխանող կողմի՝ «Սկիզբ Մեդիա Կենտրոն» ՍՊ ընկերության ներկայացուցչի դատարանին հայտնած միջնորդությունը:

Նշենք, որ պատասխանող կողմը դեկտեմբերի 15֊ին կայացած նիստում հայտարարել էր, թե ցանկանում է բացարկ հայտնել դատավորին՝ միևնույն ժամանակ դատարանին խնդրելով պարազաբանել, թե նախագահողն ինչի կապ ունի Կրթության Գիտության նախարարության լեզվի պետական տեսչության նախկին պետ Սերգո Երիցյանի հետ, ով Ռոբերտ Քոչարյանի նախագահության օրոք եղել է նաև նրա խորհրդականը:

Պատասխանող կողմի ներկայացուցչի հարցացադրմանն ի պատասխան՝ նախագահողը նշել էր, որ իր համար պարզ է թե պատասխանողն ո՞ւր է տանում՝ հաստատելով, որ Սերգո Երիցյանն իր հայրն է և 2006-2008թթ․ զբաղեցրել է ՀՀ նախագահի խորհրդականի պաշտոնը:

Միևնույն ժամանակ դատարանը հավելել էր, որ իր հայրը Հայաստանի Հանրապետության 1-ին, 2-րդ և 3-րդ նախագահների և բոլոր քաղաքական ուժերի հետ ունի լավ հարաբերություններ, իսկ ներկայիս վարչապետի պաշտոնակատար Նիկոլ Փաշինյանի հետ ունի ջերմ հարաբերություններ: Եզրափակելով խոսքը՝ նախագահողը հույս էր հայտնել, որ իր կողմից սպառիչ պատասխան է հնչեցվել:

Դատարանը նախօրեին կայացված դատական նիստում արձանագրել է, որ բացարակի վերաբերյալ պատասխանող կողմի միջնորդությունը ենթակա է մերժման:

Դատաքննության ընթացքում Ռոբերտ Քոչարյանի ներկայացուցիչ Անի Ալավերդյանը ներկայացրել է հայցը՝ մասնավորապես նշելով, որ 2018թ հունիս ամսին «Սկիզբ Մեդիա Կենտրոն» ընկերությունը հրապարակել է տարբեր հոդվածներ, որոնցում արատավորել է հայցվորի պատիվը և արժանապատվությունը, մասնավորապես` 2018 թվականի հունիսի 7-ին ընկերությանը պատկանող «www.1in.am» ինտերնետային կայքում և «ժամանակ» օրաթերթում հրապարակվել են հոդվածներ` «Գրիգոր Գրիգորյանը ցուցմունք է տվել Քոչարյանի դեմ, վերջինս կարող է կալանավորվել» վերնագրով, որտեղ տեղ են գտել Ռոբերտ Քոչարյանի պատիվը և արժանապատվությունն արատավորող տեղեկություններ, քանի որ հրապարակայնորեն ներկայացված փաստերը ամբողջությամբ չեն համապատասխանում իրականությանը:

Նույն լրատվամիջոցում 2018 թվականի հունիսի 28-ին հրապարակվել է վերլուծական ևս մեկ հոդված՝ «Քոչարյան-Սարգսյան. Արյունոտ քսանամյակի շահառուները» վերնագրով:
Ուստիև հայցվորը դատարանին խնդրել է պարտավորեցնել «Սկիզբ Մեդիա Կենտրոն» ՍՊ ընկերությանը հրապարակայնորեն հերքել զրպարտություն համարվող փաստացի տվյալները և պարտավորեցնել ընկերությանը զրպարտության դիմաց Ռոբերտ Քոչարյանին վճարել փոխհատուցում՝ 2.000.000 դրամի չափով:

Գործով դատաքննության ավարտ է հայտարարվել և վճիռը կհրապարակվի հունվարի 18-ին:

Աղբյուր` Փաստինֆո