Փաստ ինֆո

Վերաքննիչ քրեական դատարանը բեկանել է ծանր հանցագործության մեջ մեղադրվող «Օշականցի Գեւորիկի»-ի մերձավոր Սեդրակ Թովմասյանին կալանավորումից ազատելու առաջին ատյանի դատարանի որոշումը եւ նորից կալանավորել նրան։

Ավելի վաղ «Փաստինֆո»-ն տեղեկացրել է, որ «Օրենքով գող» Օշականցի Գեւորիկ մականունով հայտնի Գեւորգ Մելիքյանի մերձավորներին՝ Սեդրակ և Արշակունի Թովմասյաններին, քննչական կոմիտեն մեղադրանք էր առաջադրել Ոսկեվազի բնակչին ծեծելու եւ ծանր մարմնական վնաս պատճառելու համար, ով «համարձակվել էր» նրանց դիտողություն անել մեքենան վատ վարելու համար։ Ընդ որում՝ եղբայրներից մեկը՝ Արշակունին, «Օշականցի Գեւորիկի»-ի փեսան է։ Նրանց նկատմամբ որպես խափանման միջոց էր ընտրվել կալանավորումը եւ քրեական գործը մեղադրական եզրակացությամբ հոկտեմբերի 15-ին ուղարկվել դատարան։

Արագածոտնի մարզի ընդհանուր իրավասության դատարանը՝ Սամվել Ուզունյանի նախագահությամբ, բավարարել էր հոկեմբերի 22-ին պաշտպանական կողմի միջնորդությունը եւ մեղադրյալներից ավագ եղբոր՝ Սեդրակ Թովմասյանին խափանման միջոցը՝ կալանավորումը, փոխել չհեռանալու մասին ստորագրությամբ, ինչի դեմ վերաքննիչ բողոք էր ներկայացրել դատախազը։

Դեկտեմբերի 17-ին վերաքննիչ քրեական դատարանը մեկանել է Արագածոտնի մարզի ընդհանուր իրավասության առաջին ատյանի դատարանի 22.10.2018թ. որոշումը։ Ըստ վերաքննիչ դատարանի՝ առաջին ատյանի դատարանն անտեսել է, որ նախնաքննության սկզբնական փուլում, երբ նրա նկատմամբ որպես խափանման միջոց էր ընտրված ստորագրությունը չհեռանալու մասին, մեղադրյալը խուսափել է ներկայանալ վարույթն իրականանող մարմնին։ «Դատարանն անտեսելով հիշյալ հանգամանքը, որպես անհերքելի փաստ է ընդունել փաստաբան Անդրանիկ Բարսեղյանի և Սեդրակ Թովմասյանի հայտարարությունն առ այն, որ վերջինս չի խուսափել նախաքննական մարմին ներկայանալ:

Հատկանշական է, որ դատարանը վերը նշվածը որպես անհերքելի փաստ ընդունելիս, նույնիսկ հաշվի չի առել Սեդրակ Թովմասյանի պաշտպան Անդրանիկ Բարսեղյանի կողմից իր պաշտպանյալին կալանքի տակ պահելու ժամկետը երկարացնելու միջնորդությունը քննության առնելու դատական նիստի ժամանակ տրված բացատրությունն առ այն, որ ծանուցագիրը ստանալուց հետո, երբ դրանում նշված է եղել քրեական օրենսգրքի հոդվածը, որով Սեդրակ Թովմասյանը մեղադրյալ է ներգրավված, Սեդրակ Թովմասյանը չի ներկայացել վարույթն իրականացնող մարմին, քանի որ նրա մոտ առաջացել է անվստահություն նախաքննության մարմնի նկատմամբ:

Նշվածից առավել քան ակնհայտ է, որ պաշտպանն ինքը չի ժխտել այն հանգամանքը, որ Սեդրակ Թովմասյանը, տեղեկացված լինելով իր նկատմամբ քրեական հետապնդում հարուցված լինելու մասին, չի ներկայացել վարույթն իրականացնող մարմնի պահանջով, ավելին` թաքնվել է նրանից:

2018 թվականի փետրվարի 16-ին մեղադրյալ Սեդրակ Թովմասյանի նկատմամբ հայտարարվել է հետախուզում, և միայն 2018թ. մարտի 2-ին Սեդրակ Թովմասյանը հայտնաբերվել է և բերման ենթարկվել ՀՀ ոստիկանության Աշտարակի բաժին:

Վկայակոչված իրավանորմի և վերը նշված փաստական տվյալների համատեքստում պետք է փաստել, որ դատարանի եզրահանգումն առ այն, թե մեղադրյալը չի թաքնվել վարույթն իրականացնող մարմնից, առնվազն անհիմն է»,- եզրակացրել է վերաքննիչ դատարանը եւ ամբաստանյալ Սեդրակ Սամվելի Թովմասյանի նկատմամբ կրկին որպես խափանման միջոց կիրառել կալանավորումը:

Աղբյուր` Փաստինֆո