Փաստ ինֆո

Վերաքննիչ դատարանը որոշում էր կայացրել վերացնել Մարտի 1-ի քննչական խմբի նախկին ղեկավար Վահագն Հարությունյանի նկատմամբ Երևանի ընդհանուր իրավասության դատարանի կողմից կիրառված կալանքի որոշումը։ Քննիչը պետք է այժմ որոշի նոր խափանման միջոց, կամ էլ Վճռաբեկ բողոք տանեն։ 

Հարությունյանին կալանքից ազատելու որոշումը կայացրել է Վերաքննիչ քրեական դատարանի դատավոր Սերգեյ Մարաբյանը։ ArmDaily.am-ը մի քանի հարց ուղղեց դատավորին։

Ստորև ներկայացնում ենք հարցազրույցը.

-Պարոն Մարաբյան, Վահագն Հարությունյանին կալանքից ազատելու որոշումը կայացնելուց հետո մտավախություն չունե՞ք, որ ճնշումների կենթարկվեք, կսկսեն բացահայտումներ անել, հայտարարություններ, թիրախ կդառնաք։

-Դատավորի վարքագծի կանոններով ուղղակիորեն սահմանված է, որ դատավորը չպետք է որոշում կայացնելուց քննադատության մտավախությունից ելնի կամ նմանատիպ հանգամանքներից, եթե դատավորը սկսի մտածել, որ իրեն կքննադատեն եւ այլն, այդ դեպքում արդարադատությունը կտուժի։

-Ինչո՞ւ որոշում կայացրիք ազատել կալանքից։

-Այդ հարցերին չեմ պատասխանի, ես իմ որոշումը կայացրել եմ, դրա մեջ ամրագրված է՝ ինչի համար եմ այդ որոշումը կայացրել, ոչ բացատրություն, ոչ պարզաբանում տալու ոչ իրավունք ունեմ, ոչ պարտականություն։ Որեւէ ասելիք չունեմ, այն, ինչ ունեի ասելու, գրել եմ որոշման մեջ։

-Կալանքը վերացնելուց հետո ի՞նչ ընթացակարգեր կան, այսինքն՝ անձը ինչ կարգավիճակ է ունենում, ինչ խափանման միջոց է ընտրվում։

-Այդ հարցերով պետք է դիմեք համապատասխան մարմնին, ես ընդամենը կայացրել եմ որոշումը, որը իմ ներքին համոզմունքի եւ իրավագիտակցությանը համապատասխան որոշում է, այնտեղ նշված են իմ պատճառաբանությունները, շարժառիթները, որը նիստից հետո պարզաբանվել է կողմերին, մնացած հարցերը իմ իրավասությունից դուրս է։

- Իսկ եթե Վճռաբեկ բողո՞ք տանեն։

-Դա կողմերի իրավունքն է, Վճռաբեկ դատարանի կողմից դատական ստուգման ենթարկելը իրենց իրավունքն է։

-Իսկ եթե սկսեն ուսումնասիրություննե՞ր անել, պարզեն, որ դուք մոտ եք պարոն Հարությունյանի հետ, ինչպես օրինակ Քոչարյանին ազատած դատավոր Ազարյանի դեպքում եղավ։

-Խնդրում եմ, նման հայտարարություններ պետք չէ անել։ Ես կայացրել եմ որոշում, որը եղել է իմ ներքին համոզմունքի արդյունքը, չկա որեւէ գործոն, պատճառ, այդ հարցերը ինձ մի ուղղեք, եթե իմ կենսագրությունով հետաքրքրվեք, կիմանաք, որ ես երբեք խնամի-ծանոթ-բարեկամ գործոնով պայմանավորված որոշումներ չեմ կայացնում։ Ես որեւէ ճնշումից ոչ վախեցել եմ երբեւէ, ոչ էլ կվախենամ երբեւէ, որովհետեւ վախենալու ոչինչ չունեմ, ընդամենը օրենքի տառն ու ոգին կիրառել եմ, իմ պատկերացումներով կայացրել եմ որոշում։ Ինչքանով է դա համոզիչ, կբողոքարկվի, չի բողոքարկվի, ինչ արձագանք կունենա, դա արդեն ինձնից դուրս խնդիր է։

-Եթե օրենքի տառը պահպանելով կալանքից ազատել եք, այդ դեպքում առաջին ատյանի դատարանը օրենքը խախտե՞լ է կալանավորելով։

-Պրովոկացիա մի արեք, եռաստիճան դատական համակարգի իմաստը հենց դրանում է, կարող են լինել դատարաններ, որոնք ունեն իրավական հարցերի վերաբերյալ որոշակի համոզմունք։ Առաջին ատյանի դատարանը գտել էր, որ պետք է կալանավորել, ես գտել եմ մեկ այլ լուծում, կարող է Վճռաբեկը մեկ այլ լուծում գտնել, հենց դատական համակարգի, դատավորի անկախության իմաստը դրանում է, յուրաքանչյուր դատավոր որոշում է կայացնում՝ ելնելով իր համոզումից եւ օրենքի իր սեփական ընկալումից։

-Այդ որոշումից հետո ՀՔԾ, ԱԱԾ պետը ձեզ չե՞ն զանգահարել։

-Ինձ ոչ ոք չի կարող զանգահարել, ու եթե զանգահարեն էլ, ընդամենը ես իրենց ասելու եմ հաջողություն։

-Մատ թափ տալու մտավախություն չկա՞։

-Չի կարող լինել նման բան։ Ես 4 տարի է՝ ա՛շխատում եմ դատավոր եւ որեւէ մեկը չի կարող ինձ վրա մատ թափ տալ, որովհետեւ ես կայացնում եմ որոշում, որոնց համար պատասխանատու եմ, իմ վրա մատ թափ տալու կարիք չկա։ Ես ձեզ կարող եմ ասել, որ այդ որոշումը կայացվել է օրենքի տառին ու ոգուն համապատասխան, որը ես եմ ընկալում, եւ եթե այդ որոշումը մի օր հասու լինի ձեզ, կարդաք, միգուցե հասկանաք։

Հարցազրույցն ամբողջությամբ՝ սկզբանղբյուր-կայքում

Աղբյուր` Փաստինֆո