Փաստ ինֆո

Ազգային անվտանգության տնօրեն Արթուր Վանեցյանն այսօր դատապարտել է  «Նոր Հայաստան նոր հայրապետ» շարժման կողմնակիցների կողմից ժամեր առաջ Մայր Աթոռում տեղի ունեցած բռնության դեպքը, երբ փորձ էր արվել ներխուժել եկեղեցի։

«Եկեղեցին և պետությունը տարանջատված են, մենք որևէ իրավասություն չունենք խառնվել եկեղեցու գործերի մեջ։ Մենք կարող ենք միայն ապահովել եկեղեցու և եկեղեցական համայնքի անվտանգությունը։ Ցանկացած բռնություն դատապարտելի է։ Եթե նրանք փորձել են բռնություն գործադրել, չեն ենթարկվել ոստիկանության հորդորներին ու փորձել են մտնել ներս։ Համոզված եմ, որ եկեղեցին այնքան ուժ ու իմաստնություն ունի, որ կկարողանա այդ խնդիրը լուծել», - Ծաղկաձորում լրագրողների հետ հանդիպմանը հայտարարեց նա։

ԱԱԾ տնօրենը նաև նկատեց, որ Ամենայն Հայոց կաթողիոսի հետ վերջին հանդիպման ժամանակ խոսել է և նշեց, որ վստահ է, որ Վեհափառը «այնքան ուժ ունի, որ կկարողանա ծագած խնդիրները լուծել»։

Ավելի վաղ տեղեկացրել ենք, որ Էջմիածնում ընդհարում է տեղի ունեցել Ամենայն Հայոց կաթողիկոս Գարեգին Բ-ի հրաժարականը պահանջողների և քաղաքացիների միջև:

Մայր Աթոռի մոտ հավաքված քաղաքացիները հավկիթներ են նետել ակցիայի մասնակիցների ավտոմեքենաների ուղղությամբ, այնուհետև տեղի է ունեցել հրմշտոց: Բողոքի ակցիայի մասնակիցները սկսել են մեքենաներով հեռանալ:

Աղբյուր` Փաստինֆո